ВОДЗ НА КУВНЫ

Эз на артмы сэтшӧм сёныс, кӧні эштас менам вензьӧм;
эз на быдмы сэтшӧм зонмыс, коді кулӧм пасъяс менсьым.
Эз на сӧвмы сійӧ пуыс, кытысь меным горт пӧв артмас.
Оз на тыдав сійӧ туйыс, кӧні смертьыс менӧ гартас.
Эз на пуны сэтшӧм вина — менӧ казьтігмоз мед юны.
Эз на лӧсьӧдны машина — медым менсьым гортйӧс нуны.
Абу печкӧма на шӧртсӧ — медым гортвыв дӧра кыны.
Абу аддзӧма на кӧртсӧ — медым гу дор потшӧс йитны.
Уна кок туй на ме коля, уна кӧм-паськӧм на кисьта.
Кытчӧ дӧзмӧдчыны вола — оз на некод ӧні висьтав.
Мыйта верма, буртор вӧча: содтӧд садитала пуяс,
йӧзкӧд ӧтув гӧра-й кӧдза... Ог на тэрмась пырны муас.