ЮӦРПӧсь сьӧлӧм уси быттьӧ кӧдзыд ваӧ, и сюрса лыӧй из улын моз доймис... Кыдз сӧмын пошта татшӧм юӧр вайӧ, кор сэтшӧм ичӧт маркаыслӧн доныс! Кӧть позьӧ вӧлі письмӧыслы вошны, но вошӧм пыдди аддзис менсьым гортӧс. Эз ков конвертсӧ меным эськӧ восьтны, но локтысь юӧр веніс дзоля мортӧс. И бӧрда ме — бур друглӧн сувтіс сьӧлӧм, и сӧстӧм сынӧд — сылы ковтӧмтор нин... Гӧрд синва войтъяс гылӧдӧны чӧла лӧнь пелысь пуяс менам керка дорын.
