* * *

Регыд узян тэ, гожся шондіӧй,
Он и кусӧдлы сотчысь кыатӧ.
Муртсысь тыдовтчас сьӧлӧм шонтысьӧй,
Тэ нин вӧр сайсянь мыччан киястӧ.

Муса ныв менам тэысь яндысьӧ,
уджын тэ бӧрся кӧсйӧ вӧтчыны.
Сьӧлӧм дойдалӧм — сыкӧд аддзысьлӧм,
Тэ кӧть, шондіӧй, сёрмышт ӧтчыдысь.

Сет мен ӧзтыны югыд муслунӧс,
нывлы сьӧлӧмас пырны нэм кежлас.
Медым радейтчӧм олас куслытӧг,
быдмас шуд менам паськыд енэжӧдз.

Узян дженьыда, гожся шондіӧй,
он и кусӧдлы сотчысь кыатӧ.
Эн на тэрмӧдлы сьӧлӧм шонтысьӧс —
эн на мыччав тэ югыд киястӧ.