* * *

Тувсов луныс сьӧлӧм пиӧ
Меным пырӧ югыд шорӧн.
Лун тӧв кутлӧ небыд киӧн,
Локтӧ шудӧй дзоридз сорӧн.

Лӧзов енэж лунтыр восьса,
Шонді ветлӧ аслас йӧрӧд.
Кӧть тэ кодарӧ эн восьлав —
Быдладорын трактор гӧрӧ.

Гым кӧ ылалӧмӧн волас,
Киссяс сійӧ шоныд ваӧн.
Сӧмын паськыд чардби бордъяс
Ӧшйыласны керӧс сайӧ.

Сувта Эжва кыркӧтш йылӧ
Паныд гырысь войта зэрлы.
Ог и тӧдлы — лолӧй сьылӧ,
И оз бергӧдчыссьы бӧрвыв.

Быттьӧ чужи ӧні выльысь,
Быттьӧ водзынӧсь на туйяс;
Аддза медводдзаысь ылысь
Тӧдтӧм аддзывлытӧм муяс.

Тулыс, тулыс, ыджыд аттьӧ!
Ловзя ме быд ловъя ловкӧд.
Аттьӧ, мый тэ локтін татчӧ
Да он лӧгав миян воккӧд.