ДРУГЪЯСМайбыр олӧм! Ставыс ас йӧз. Менам другъяс эмӧсь тырыс. Кодкӧ чужан лунтӧ пасъяс, Кодкӧ рытйысьыштны пырас... Эм Москваын, роч йӧз пӧвстын Медся ыджыд другӧй — Виктор — Менам шудлысь кодзув ӧзтысь, Менам медся югыд битор. Друг грузин, Лордкипанидзе, Меным вӧзйывлӧ Тбилиси: Керка ӧдзӧс восьсӧн видзӧ, Мыччӧ отсӧг вылӧ кисӧ. А казах Ахмет мен шуӧ: «Шоныд зэв Алма-Атаын; Пӧрысь кежлад татчӧс муӧ Рӧднад-вужнад локтӧй ставӧн». Эг нин ӧтчыд чӧскыд вина Молдаванечьяскӧд юлы. Врач эстонеч кужысь кинас Менсьым рана бура вурліс. Ме латышкӧд кыйлі чери, А литовеч дорччис мекӧд. Тшыг и сёян юклім шӧри. Лёктор мен эз вӧчлы некод. Коркӧ ме и Фрунзе карын Овлі збой киргизъяс дорын. Менӧ гӧститны быд арын Другъяс ӧнӧдз дасьӧсь корны. Друг Курбан эм Душанбеын — Йӧзлы сьӧлӧмсяньыс сьылӧ. Уна во нин менам пельын Олӧ муса гӧлӧс сылӧн. Белорусӧн шуа внукӧс. Украинка-внучка быдмӧ. Минскын, Киевын эм другъяс — Частӧ нянь-сов налысь видла. Став Союзын миян олӧм Ӧткодь шудӧн ӧні тыра. Мед кӧть кытчӧ лоас волӧм, Повтӧг быдлаӧ тэ пыран. Ереванысь кӧть Бакуысь, Ашхабадысь кӧть Ташкентысь (Локтан кӧть тэ мутӧм-муысь) — Сюрас другыд тэныд сэтысь. Мед жӧ внучкалӧн и внуклӧн Нӧшта ёнмас дружба кытшыс. Мед жӧ миян чужан мулӧн Нӧшта содас югыд мичыс.
