ӦТИ ЛОЛӦН

Москвалысь лов шы весиг кылам тані,
и радлун ӧні сьӧлӧмӧ оз тӧр.
Сӧветскӧй улича — дзик Мавзолейлы паныд,
а Коммунистическӧйсянь — аддзам Кремльлысь шӧр.

Кор олӧм бур да матын пельпом друглӧн,
быд асывводзын выль ног садьмӧ морт,
выль синмӧн аддзӧ ывлаыслысь югдӧм,
и мичлун тыртӧ сылысь олан горт.

Кӧть важкодьыс на чизыр татчӧс вой тӧв,
кӧть мулӧн морӧс уналаті кын,
бур озырлунӧн войвыв муыс ойдӧ,
из гӧра чегмӧн мортлы сюрӧ вын.

Веж парма ассьыс выльмӧдалӧ паськӧм —
кӧрт трубаясӧн вурлӧ нюр да сьӧрт.
Би югӧр войын ворсӧ енэж пасьта
да туйяс пӧлӧн каттьӧ ассьыс шӧрт.

Москвакӧд лолалӧны ӧти лолӧн
и кар, и сикт, и вӧр, и тундра эрд.
Зэв ыджыд шуд — бур другкӧд ӧтув олӧм.
И шудыс тайӧ нэмсӧ олас мед.