КОММУНИСТЪЯС

Асъя шондіыс лым вывті котӧртӧ —
уджӧ босьтчытӧдз вӧчӧ зарядка;
став лун югыдсӧ ас гӧгӧр котӧртӧ,
войся пемыдсӧ му бердӧ копыртӧ,
бӧрйӧ лэбзян площадка.

Асъя шондіыс тэрмасьӧ суӧдны
миян уджъясын водзмӧстчысь мортӧс,
коді вермӧ ас бӧрсяыс нуӧдны,
коммунистӧн став йӧз кодӧс шуӧны —
ставлысь медся бур ёртӧс.

Вына пожӧмъяс пармаын ружтӧны,
асъя кыалы пӧрӧны паныд.
Лымсӧ тракторъяс дугдывтӧг юждӧны...
выль геройяс бур славаӧн чужӧны
уджвыв бушколын тані.

Карын, сиктъясын керкаяс тэчӧны,
атом кӧртавны дорӧны домӧд,
лыдтӧм уна машинаяс лэдзӧны;
коммунистъяс, кыдз вермӧны, вӧчӧны
йӧзӧс шудаӧн, томӧн.

Джуджыд шахтаяс биясӧн тырӧны,
гӧрд звезда быд копёр вылын ӧзйӧ;
из шом пластӧ комбайнъясӧн пырӧны
да пӧрӧдасӧ взрывъясӧн кырӧны
бур вожакъясыс йӧзлӧн.

Нефть да газ, кӧрт руда муысь босьтӧны
(и оз кутны ни ваяс, ни изъяс),
паськыд нюръяс, лёк зыбучьяс косьтӧны,
Выль плотинаа мореяс восьтӧны
миян йӧз — коммунистъяс.

Югыд шондіыс лым вылысь качӧдчис,
паськыд енэжын вахтасӧ нуӧ.
Сылӧн югыдыс быдлаӧ паськӧдчис.
Став му пасьтаыс быдӧнкӧд асмӧдчис
коммунистъяслӧн шуӧм.