СЬӦЛӦМ ДОЙ

Восьлалӧ олӧмыс водзӧ и водзӧ,
во бӧрся котӧртӧ гажаджык во.
Кыаыс ӧтмоз жӧ югыда сотчӧ.
Радейтчӧм ковтӧмӧн некор оз ло.

Сӧмын тай регыд зэв кыаыс ӧзйӧ —
кӧдзалӧм енэжыс кодзулӧн тыр.
Сӧмын тай пӧрысьмӧм вӧтӧдны кӧсйӧ.
Мед жӧ кӧть сьӧлӧмысь муслун оз быр.

Радейта важ моз жӧ кыалысь сотчӧм,
радейта сьӧлӧмсянь кодзула вой.
Радейта пукыштны тэкӧд ме орччӧн,
шудӧй тэ менам да сьӧлӧмлӧн дой.

Радейта важ моз жӧ видзӧдны синмад,
ӧтлаын сёрниттӧг коллявны лун.
Радейта шулывны нывдырся нимнад.
Нывдырся мичлуныд некор оз вун.

Шондіыс радейтӧ шонтыны мусӧ,
радейтчӧм песталӧ сьӧлӧмын би.
Мыйла нӧ, мыйла нӧ кыаыс кусӧ,
мыйла нӧ, мыйла нӧ пӧрысьмам ми?!