КОМИ МУӦЙ

Коми муӧй — коми ичмонь! Югыд шонді ӧзйӧ тан.
Лунысь лунӧ бурмӧ, мичмӧ тэнад сӧстӧм чужӧмбан.
Морӧс вылад орден чукӧр. Сійӧ весьшӧрӧ эз шед.
Тэкӧд ворсӧ шонді югӧр, тэныд шойччыны оз сет.
Тэ эн тӧдлыв уджысь полӧм, кӧдзыд тӧв эз кыпӧд шог.
Тэнсьыд кокньӧдісны олӧм матыс чой да матыс вок.
Тэнсьыд сёрни, сьыланкывъяс кывны позьӧ сэсь и тась.
Тэнсьыд лӧсьыд зарни кияс босьтны быдӧн ӧні дась.
Тэнад озырлуныд уна, тырмӧ сям и кужанлун.
Тэнад слава ылӧдз мунӧ, тэнад бур нимыд оз вун.
Тэнад тшӧкыд вӧраинъяс, паськыд юяс, помтӧм шор,
джуджыд тыяс — югыд синъяс, быдмысь каръясыдлӧн гор, —
ставыс ёна тӧдса меным, ставыс сьӧлӧм пиын эм.
Важӧн дась ме тэкӧд сӧмын кольны ассьым шуда нэм.