МАКСАКОВКАЫН

Максаковкаӧ волі, йӧзкӧд тӧдмаси сэн.
Сэтчӧс уджалысь-олысь тадзи висьтасис мен:
«Зэръяс мыськӧны морӧс, шонді банйӧдӧ мыш.
Удж тан — помыс ни дорыс: уджав — уджач кӧть дыш.
Вывсянь кывтӧны керъяс — ӧдва лолалӧ ю.
Сӧмын кывла ме: «Тэрмась!»
Некод «шойччышт!» оз шу.
Гарта эбӧсӧй быртӧдз помтӧм сутуга пом,
гарта асывсянь рытӧдз, кӧть ме абу нин том.
Ён машинаыс мурзӧ, лэдзӧ пур бӧрся пур.
Вурсьысь быттьӧкӧ вурсьӧ. Сылӧн вурантор бур.
Ме ог норасьны вӧзйысь, ме ог мудзӧмысь пов.
Сӧмын висьтавны кӧсъя, мый ог весьшӧрӧ ов.
Мудзтӧм уджыд оз овлы, мудзтӧм удж — абу удж.
Мудзтӧм олӧмӧн овны талун ог на ме куж.