* * *

Гым ньӧвйӧсь роскыс чышкӧ енэж лэбув,
сьӧд кымӧр чукӧр вайӧ татчӧ зэр.
Ми тэрмасьӧмӧн киӧ босьтам лэбын
да пажын пыдди чӧвтны мунам бӧр.

Быд турун юр, кыдз ыджыд тӧдтӧм лэбач,
борд паськӧдӧмӧн вывлань лэбзьӧ чӧв.
А ылыс зэрлӧн кывмӧн содӧ эбӧс,
и лов шы сылысь вайӧ шоныд тӧв.

Ён багатыр кодь сувтіс турун зорӧд,
ми сыналім и вылас ӧшлім ньӧр.
Зэр довъяліс и кытшлаліс сы дорӧд —
ас сёрмӧм вылас сійӧ вӧлі скӧр.

Кос турун пиын быттьӧ шонді торъяс —
мыш шонтыны пӧсь сынӧдӧн зэв бур,
Том серам киссьӧ сёрмӧм пажын дорас,
а мудзӧм вылӧ норасьысь оз сюр.

Вот гылалісны зэрлӧн бӧръя войтъяс,
лӧнь рытыс чӧскыд дукӧн лоис тыр.
Бур унмӧн узьӧм мудзӧмнымӧс босьтас.
И асывводзлы сьӧлӧм радлас дыр.