МЕД СОДАС ШУД

Кымынысь кӧть выль воыд оз волы —
мортлӧн радлӧм оз ӧд некор быр.
Татшӧми нин аслыссяма олӧм —
Мыйкӧ корсям, мыйкӧ виччам пыр.

Чайтам, шонді югыдджыка ӧзъяс,
сьӧлӧм пиын лоас унджык вын,
и быд бурсӧ олӧм миян вӧзъяс...
Мӧвпъяс дзугйысь некыдзи он мын.

Сӧмын он и тӧдлы, кыдзи вуджан
вояс костын куйлысь дженьыд пос;
он и тӧдлы, кыдзи тыран уджӧн.
И пыр водзӧ — бӧрвыв он ӧд кос.

Водзӧ, водзӧ — выль вояслы паныд:
медым шогсьӧм сьӧлӧмӧд эз кут,
медым быд лун унджык керка панны,
медым содас воысь воӧ шуд!