* * *

Быд сиктса пачысь енэж лӧзас
Тшын кайӧ, быттьӧ шабді вез.
Ю дорын пожъясьӧны йӧзыс,
Яг шӧрын поткӧдлӧны пес.

Гӧсьт пыдди волӧ карса олысь —
Мед сиктса сынӧдыс эз вун,
Мед нӧшта ӧтчыд небыд корӧсь
Бӧр чужтас челядьдырся ун.

Пыр важ моз юкмӧс васӧ вӧзйӧ,
Ру самӧварысь петӧ дыр.
Но ӧшинь югыдлӧзӧн ӧзйӧ —
Москвалӧн шыяс керка тыр.

Туй чукӧр — быттьӧ ньӧвъя визьяс;
И томлун весьшӧрӧ оз ов —
Му сыкӧд шоналас и мичмас,
И сӧвмас сэн быд ловъя лов.

А кыа дзирдалӧмыс кадлӧн
Сикт весьтӧ паськӧдӧма сыв —
Столица гӧрысь мортлы радлӧ,
Сы йылысь сьылӧ сьыланкыв.

Бур шоныд пывсянъяс и пачьяс,
И ывлавывса уджлӧн гор —
Эм сиктлӧн нэмӧвӧйя пасъяс.
Он шу, мый тайӧ ковтӧмтор.