ЭН ЛӦГАСЬ

Эн жӧ кӧть нэм кежлад лӧгась,
Тэтӧг мен олӧм оз ло.
Тӧдлӧмӧн некор эг вӧчлывлы лёкӧс;
Ӧні дась сетны тэн лов.
Бадьлӧн кӧть векньыдӧсь коръяс,
Гез кодь жӧ кузь сылӧн вуж.
Ловзяс любов, лӧгыс косьмас, —
Торйӧдны некод оз куж.

Ю кӧть и паськыд и джуджыд,
Лӧнь дырйи гыӧн оз ворс.
Ачыс оз чуж ни оз матыстчы шудыд,
Ӧтув кӧ сійӧс он корсь.
Видзӧдлы меліа ӧтчыд
Ме вылӧ, кудриа ныв.
Эз ло мед гажтӧм да кӧдзыд,
Сьӧлӧмсянь шу мен бур кыв.

Вӧр кӧть и джуджыд и тшӧкыд,
Вӧралысь туйысь оз вош.
Тӧда ме: пырны тэн сьӧлӧмад сьӧкыд,
Ачыд кӧ туйсӧ он восьт.
Сэтчӧдз ме корны ог дугды,
Нюм тэнад кытчӧдз оз пет,
Кытчӧдз тан ставнас оз югды,
Кытчӧдз надежда он сет.