ВЫЛЬ КӦРТ ТУЙ ДОРЫН

Зон зумыштчӧма, нюмъёвтны оз кӧсйы,
Оз видзӧд, кӧні нывлӧн самосвал.
Ковш бӧрся ковш машинаяслы вӧзйӧ,
Йӧз дивуйтчымӧн талун сійӧ яр.

Сы киподулын экскаватор ворсӧ,
И паськыд шорӧн киссьӧ чорыд му.
Зон, быттьӧкӧ, карьерысь шудсӧ корсьӧ,
Да некыдз сійӧс тэрмасьтӧг оз су.

Быд дас минут мысти ӧвтыштӧ лӧз чышъян,
Быд дас минут мысти вошлӧ югыд лун.
Но кытчӧ нылӧс радейтӧмысь пышъян,
Кӧть тӧрытъя ӧбида эз на вун!

Ныв клубын сылы серам могысь шуис:
«Тэ йӧктыны ни радейтны он куж...»
Механик сэсся бӧръя вальсӧ нуис,
И вальсыс сійӧ вӧлі помтӧм кузь.

Дерт, нывлӧн ӧнӧдз ставыс тайӧ вуні,
И кисьтӧ нюм кабина ӧшинь пыр.
Эз тӧдлы весиг, кыдзи коли луныс:
Пӧсь радейтӧмӧн сьӧлӧмыс дзик тыр.

Зон мӧвпалӧ: «Туй воас Сыктывкарӧдз...
Сэн овмӧдча и гортӧ бӧр ог лок.
Ме олі аслам сиктын кызь вит арӧдз,
И некор мен эз вӧвлы татшӧм лёк».

Вот лэччис шонді. Эжва дорын том йӧз.
Вот тӧдса зонлы шуӧ тӧдса ныв:
«Прӧстит тэ менӧ, сьӧлӧмыд кӧ доймис...»
И топалі нин зонлӧн паськыд сыв.

Зон нылӧс койӧ аслас мелі кылӧн:
«Мен тэкӧд ӧтув муса му и ва.
Ме ачым мыжа. Ӧні сьӧлӧм сьылӧ.
И гажтӧмлун мен некод оз нин вай».

Том йӧзкӧд олӧ радейтчӧм да гажлун,
Том ныв-зонъяслӧн биӧн пуӧ удж.
Ми регыд тась выль кӧрт туй ставӧн аддзам,
Кӧть Емва вомӧн сійӧ эз на вудж.