АР

Кымӧрлӧн бурсиыс му кузя кыссьӧ,
Ловзьӧны, гажмӧны косьмылӧм шоръяс;
Эжвалӧн мыш вылыс паськалӧ, гызьӧ;
Киссьӧны пуяслӧн вижӧдӧм коръяс.

Ӧвтыштіс бордъяснас войвывса гожӧм,
Ӧтвылысь юсьяскӧд лунвылӧ лэбис.
Ар аслас ыркыдӧн пырӧ быд вожӧ:
Быттьӧ став вӧр-васӧ гожӧмлысь ньӧбис;

Воськовтӧ ӧтарӧ — вотӧсъяс кисьтӧ,
Воськовтӧ мӧдарӧ — копрӧдлӧ пуяс;
Быдлаӧ сибалӧ, быдлаӧ письтӧ,
Лов шынас шызьӧдӧ, паськӧдӧ туйяс;

Уджалысь войтырлы озырлун вайӧ,
Сьылӧм да гажлун быд керкаӧ пыртӧ;
Козьналӧ миянӧс выйӧн и яйӧн
Да элеваторъяс шобдіӧн тыртӧ.

Кымӧрлӧн бурсиыс му кузя кыссьӧ,
Югыд шӧвк лентаӧн шондікӧд ворсӧ.
Кельыдлӧз енэжыс мичмӧдчӧ, мыссьӧ,
Нюмъялысь синъясӧн миянлы воссьӧ.