МЕНАМ НЫВЛЫ

Тэ чужин талун, менам югыд тӧлысь.
Ме тэнӧ ёна виччыси, бур ныв.
Тэ аскӧд вайин меным гажа тулыс;
Тшӧтш тэкӧд чужис менам сьыланкыв.

Том мамыд, быттьӧ тувсов кадся льӧм пу,
Тэ — сылӧн нежнӧй чӧскыд дука цвет.
Кӧть морӧс бердас ваян ассьыд вомтӧ,
А мый сэсь корсян, ачыд он на тӧд.

Тэ чужанінын медся небыд гожӧм,
Тэ чужанінын олӧм — тувсов сад.
Тан чужӧ йӧз, кыдз ягын посни пожӧм,
И бать-мам нывлы-пилы ӧтмоз рад.

Ме тэнсьыд олӧм водзвыв ог кут сьывны;
Тэн паськыд туйыс гӧгӧр уна эм.
Тэ мича цвет моз, менам нылӧй, быдмы,
Тэ быдмы збоя — тэнад шуда нэм.