ТОМ МАШИНИСТ

Джуджыд пожӧма вӧр, быттьӧ мойдын,
Туйлысь топӧдӧ векньыдик визь;
Лымйӧн коясьӧ мудзлытӧм вой тӧв,
Но том мортлӧн том сьӧлӧм оз вись.

Войлысь эшкынсӧ вундӧ прожектор,
Ворсӧ, дзирдалӧ рельс вылын пуж...
Тайӧ мичсӧ не вунӧдны некор,
Кӧть и висьтавны ставсӧ он куж.

Кынмӧм шпал вылын рельсъяс оз вӧрны,
Поезд ру пиын лэбзьӧ, кыдз ньӧв;
Пушкыр пожӧмъяс кольӧны бӧрвыв,
Машинист водзӧ видзӧдӧ чӧв.

Саӧн неуна ляксьӧма бандзиб.
Мый нӧ вӧчан, кӧть гӧтыртӧм морт?
Мый нӧ вӧчан, кӧть нылысь и яндзим?
Паровозыд тай абу курорт.

Он ӧд тані быд воськолын мыссьы.
Саысь, номйысь моз, некыдз он мын.
Поезд сувтіс. Перрон вылын шызис.
Воши том мортлӧн смеллун и вын.

Аслыс колӧ, а сьӧлӧмыс полӧ:
«Медым волас... Мед сёрмас, оз су...»
А кор аддзис, кыдз унаысь овлӧ,
Сӧмын нюммуніс, нинӧм эз шу;

Ӧдйӧ лэччис да котӧртіс паныд,
Нывлысь нежнӧя топӧдліс ки.
Абу, тыдалӧ, первойысь тані,
Абу тӧрытсянь сьӧлӧмас би.

Вӧрзис поезд да чушкигтыр муніс...
Том учительша чышкыштіс син;
Кӧдзыд вой тӧвлӧн чизырлун вуніс,
Кинас видлаліс окалӧмин.

Гортын пукаліс рӧмпӧштан водзын,
Нюмпыр видзӧдіс саӧссьӧм бан;
Мелілунсӧ да радлунсӧ соддзӧн
Сылӧн сьӧлӧмыс кояліс тан.