ЭНЛЫ МУН

Менам сьӧлӧмшӧр, зарниӧй менам,
Некор дум вылысь вунлывтӧмтор,
Тэнсьыд кывзышта сёрни да серам,
Энлы мун, талун абу на сёр.

Тэнад сёрни — мен скрипкалӧн шыяс,
Тэнад серам — мен сӧдз шорлӧн гор.
Мед жӧ найӧс ме дырджык на кыла,
Энлы мун, талун абу на сёр.

Шоныд тувсовъя лун меным воӧ,
Тэ кӧ ме дінын, мелі бур ныв.
Сьӧлӧм жугыльтчӧ, нюм менам вошӧ,
Ог кӧ гӧлӧстӧ тэнсьыд ме кыв.

Энлы мун, сьылам сьыланкыв мекӧд,
Сьылам олӧмлысь шуда бур кад.
Мед тшӧтш миянкӧд сьыласны мукӧд,
Медым сьылас веж тувсовъя сад.