ПАРКЫН

Муса пиӧй, сулышт муртсысь,
Кывзышт менсьым ичӧт висьт:
Коркӧ дзиръя тані дзуртіс,
Няйтла воськовтны эн письт.

Сісьмӧм чери дукӧн пӧдтіс,
Гутъяс курччалісны ныр,
Котралісны кокъяс бердті
Йӧзысь повтӧг вурдысь, шыр.

Тэныд дивӧ, тэ он эскы:
Кыдз нӧ вермис лоны тадз?
Тані сынӧд ма кодь чӧскыд,
Тані вӧр кодь паськыд сад.

Тані гӧгӧр дзоридз ловзьӧ,
Тані рытын югыд би,
Тані кылӧ юлӧн лов шы...
Мен эз эскы менам пи.

Олӧм мунӧ, олӧм вежсьӧ:
Гӧгӧр быдтор ӧні бур.
Он кӧ аддзыв туйяс вӧчӧм,
Шуан: некӧн эз вӧв нюр.

Тшыгйӧн олӧм он кӧ тӧдлы,
Он куж сетны няньлы дон.
Он кӧ номлы сёйны шедлы,
Он тӧд, мыйла вӧчсьӧ вон.

Менам пиӧй коркӧ быдмас,
Аслас пилы шуас тадз:
«Орччӧн вӧліны тан сиктъяс;
Шонтіс керканымӧс пач».

Пиыс батьыслы оз эскы,
Шуас: «Тані ставыс кар.
Мыйла пачыс, мыйла пескыс,
Эм кӧ трубаясын пар?»

Муса пиӧй, батьлы эскы,
Тэныд аслыд эскас пи.
Батьлӧн висьталӧмыс веськыд,
Шудсӧ чужтіс сылӧн ки.