ЗБЫЛЬМӦ ЭСКӦМЫС ЙӦЗЛӦН

Вӧля радейтысь вына народ
Збоя стрӧитӧ выльнога олӧм.
Ыджыд шуд ассьыс паськӧдӧ борд,
Сьывсьӧ сьыланкыв гажаджык горӧн.

Ставлы тыдалан паськыд бур туй
Миян партия быдӧнлы восьтіс;
Коммунистъяслӧн слава оз кув,
Налысь нимъяс историк оз вошты.

Йӧзӧс чуксалӧ, кыпӧдӧ вын;
И быд морт сылы сьӧлӧмсянь эскӧ.
Миян партия — компас и син,
Коммунизмлӧн став мирлы предвестник.

Тӧдам ставӧн, мый шондіысь лун
Некыдз торъявны некор оз вермы.
Ӧтнас партия йӧзтӧг оз мун,
А народ сыкӧд некор оз йӧрмы.

Враглӧн вирыс кӧть мыйта оз пу,
Вынйӧр миян век лунысь лун содӧ.
Помам изъясӧн ю бӧрся ю,
Багатыръяс моз восьлалам водзӧ.

Абу ӧткаӧсь му вылын ми:
Микӧд войтыр миллярд мында мунӧ.
Сылас кӧдзыд войналӧн пеж йи —
Йӧз кӧ бдительносьт йылысь оз вунӧд.

Миян партия сувтӧдіс мог:
Водзӧ стрӧитны, мичмӧдны олӧм;
Дзикӧдз бырӧдны му вылысь шог —
Мир дор сулавны. Сӧвесьт тадз корӧ.

Ставӧн тӧдам: оз весьшӧрӧ вош
Выль решение миян партсъездлӧн;
Оз нин первой страничаяс восьт
Шудлысь. Збыльмӧ век эскӧмыс йӧзлӧн.