ВОЙ ТӦВ

Кӧдзыд вой тӧв, весьшӧрӧ эн скӧрав,
Бус кодь лымйӧн паськыд туй эн тырт!
Ассьыд вӧля миянлы он кӧлав,
Сьӧлӧм пиӧ кӧдзыдлун он пырт.

Вунӧд, кыдзи важӧн вӧлӧк костын
Шыбӧль бокӧ жмитлін вӧла-додь,
Кыдз эн ӧтчыд туйын ловсӧ босьтлы
Коми мортлысь. Тайӧ ӧні — мойд!

Талун поезд мунӧ тэныд паныд,
Бӧрвыв кольӧ тшын да еджыд ру.
Оз нин некод повзьы тэысь тані
Абу тэнад паськыд войвыв му!

Юяс вомӧн, вӧрӧд, тундра эрдӧд,
Сэтчӧдз, кӧні быдмис Вӧркута,
Ылі кӧдзыд йиа море бердӧдз
Водіс рельсъяс улӧ пожӧм шпал.

Сэн, кӧн муыс нэм чӧжыс эз сывлы,
Ставыс ловзьӧ, томмӧ лунысь лун;
Асъя югыд оз нин сэсся чинлы,
Некор татысь вына морт оз мун!