ВЕЖ ЮРСИА НЫВКАВеж юрсиа нывка — Еджыд чужӧмбан! Ветлӧ, юсь кыдз кывтӧ, Пызан костӧд тан. Нюмъялӧны синъяс, Варовитӧ вом. Код дорӧ оз шыась, Быд морт лоӧ том. «Чолӧм, — шуи сылы, — Чолӧм, мича ныв!» «Чолӧм...» Сьӧлӧм сыліс, Воши менам кыв. «Мый нӧ тэныд колӧ, Кутшӧм сёянтор?» Ог тӧд мый и кори. Сёйсис. Вӧлі сёр. Сёйӧм дон кӧть мынті, Мунны вӧлі дыш. Быттьӧ кокӧс кынтіс, Быттьӧ висьмис мыш. Дыр-ӧ нӧшта олі, Бура ог нин тӧд. Дзик тай ӧтнам коли. Гортӧ ме эг мӧд. Ывла вылын ветлі, Колли пемыд вой. Сӧмын шонді петіг Лӧнис сьӧлӧм дой. _____________ «Сёрни панны кужин — Эн на нылӧс вен». Уна ӧбед, ужын Лои сёйны мен. Тӧда нимсӧ, овсӧ, Тӧда чужан лун, Тӧда, кутшӧм лов шы; Серамыс оз вун. Кӧть эг этша воськов Орччӧн вӧчлӧй ми, Эз на кутлы коскӧд Сійӧс менам ки. Шуа: «Муса нылӧй!» Шуа: «Сьӧлӧмшӧр!» Он пӧ менӧ ылӧд, Весьшӧрӧ эн сӧр! «Мыйла нӧ он эскы, Воча мен он лок?» Кӧмкотӧй пӧ дзескыд, Дойдӧ менсьым кок. Сераліс эз ӧтчыд. Мыйла? Ме эг тӧд. Ӧшӧдчы, кӧть вӧйтчы! Сьыв, кӧть сэсся бӧрд! _____________ Дыр эз вермы кольны тадзи, Талун локті гортас. Муса нывлысь мамсӧ аддзи, Аддзи тӧлка мортӧс. Визув шорӧн мунӧ сёрни; Мыйысь эськӧ повны, Мыйла нывлысь ки не корны, Медым гозйӧн овны! «Нина том на, — шуӧ мамыс, — Зонъясысь на полӧ; Медым содыштас на сямыс, Мед на мамкӧд олӧ. Томӧн верӧс сайӧ петӧм — Нинӧм оз сет буртӧ. Дойыд кокньыдджыка шедӧ, Сьӧкыдджыка бурдӧ. Ме эг чайт, мый тадзи овлӧ, А вот суис рӧкыд. Шоглысь паськӧм век на новла, Век на меным сьӧкыд». Ольга Алексеевналӧн Эз вӧв гажа висьтыс. Шоглӧн кӧрыс — абу малӧн, Тальӧм оз — оз кисьмы. __________ Сьӧкыд шуштӧм тшын войналӧн Вевттис уна мортӧс. Воши сӧдзлун уна валӧн, Уна йӧзлӧн гортыс. Ольга Алексеевнаӧс Тайӧ шог эз кедзовт. Верӧс ветліс нёль во саяс... Надейтчӧм эз кӧдзав. Быд лун ӧтмоз рыт и асыв Думнас верӧс дорын. И эз ӧтчыд юӧр часын Сійӧ бӧрддзыв горӧн. Аслыс сямӧн олӧм гартчӧ, Он тӧд, кодлӧн кыдзи: Ӧтик визув паныд вартчӧ, Мӧд морт кывтӧ сідзи; Ӧти радейттӧг оз окышт, Мӧдлы быд морт муса. Алексеевналӧн шогыс Вӧлі нывсьыс гуся. Бӧръя кадӧ эз тӧд кӧні Ветліс сылӧн верӧс, Гашкӧ, уси, сюрис пленӧ, Косьмис югыд вирыс. Кыа — тожӧ шонді югӧр, Пӧтка чипсӧм-сьылӧм; Эм кӧ письмӧ, эм кӧ юӧр, Озджык шогсьы сьӧлӧм. _________ Война эштіс, война кусі, Вӧрӧг ловсӧ воштіс. Шонді югӧр муӧ уси, Йӧзлысь синва косьтіс. Коді батьсӧ, коді воксӧ, Коді жӧникпусӧ Кутлӧ, окалӧ... Да ворсӧ, Оз кыв кокув мусӧ. Верӧс ловъя, верӧс тані... Сӧмын важсьыс ылын. Сійӧ аддзӧма выль аньӧс. Воши батьыс нывлӧн. Мыйла артмис тайӧ тадзи, Ольга эз ло муса? Помка талысь ме эг аддзы. Эм кӧ сійӧ — гуся. Алексеевна эз висьтав, И эз висьтав Нина. «Мыль кӧ петас — коркӧ письтас», Шуны мӧдтор нинӧм. Тадз, дерт, тшӧкыда оз овлы. Сӧмын век на эмӧсь Урӧс пуяс; кӧть оз ковны, Аддзан паськыд вӧрысь. Быдмис Нина, Нина туис, Кыдзи мича пожӧм. Коли сизим тӧв да тулыс, Сизим шоныд гожӧм. Бать эз волы, бать эз видлы, — Вуні нимыс сылӧн. Ӧні батьтӧг он кув тшыглы, — Но ӧд эм на сьӧлӧм. ___________ Веж юрсиа нывка — Еджыд чужӧмбан! Ветлӧ, юсь кыдз кывтӧ, Пызан костӧд тан. «Волы, нывка, татчӧ!» — Шыалӧ сусед. Нывка, кӧть и аддзӧ, Сёйны оз на сет. Шуӧ: «Эн на шонав. Тэрмасьны оз позь». «Аттӧ, кутшӧм вома! Аттӧ, кутшӧм ёсь!» «Сылӧн уна пызан, Сылӧн уна удж, Сійӧ абу мыжа, Вердны кӧ эз куж; Нёль пельӧ он торъяв, Ставлы тшӧтш он ну», — Нинаӧс тадз доръя, Мед сусед эз пу. А сусед пыр скӧрмӧ. Жалӧбнӧй пӧ вай! Шуӧ: «Ог на йӧрмӧй! Вылӧ эн на кай!» Мыйта кӧть эн сюяв Сісьмӧм пыжлысь розь, Мыйта кӧть эн сирав, Дзоньтыны оз позь. Мукӧд мортыс тадз жӧ, Висьталан кӧть он, Тӧдӧ сӧмын асьсӧ, Ассьыс лэптӧ дон. Вот и сёйсис, юсис, Нина вайис счёт. «Аттьӧ!» — менам шусис. Пӧт морт — шуда морт! Кад нин эськӧ мунны, Но сусед оз мун. «Сёйны мыйкӧ вуніс, Али босьтіс ун?» — Юаліс тадз Нина. «Аттьӧ. Пӧт. Ог узь. Вай мен сё грамм вина; Рытыс зэв на кузь», — Бӧръя кыв суседлӧн Петіс синва сор... Мыйта паськыд светлӧн Аслыссяматор! «Висьтав, он-ӧ тод тэ Юсь кодь нывлысь ов? Яндзим сэсь, мый бӧрдсьӧ, Сэсь, мый сибдӧ лов». «Петлякова Нина — Сылӧн ов да ним». Ортсӧ киссис вина, Бансӧ вевттис лым. Нина чуймис, повзис: «Мый нӧ тэкӧд, ёрт?» «Йӧя менам овсис, Вошті ассьым горт. Видзӧдлы мен синмӧ, Он-ӧ менӧ тӧд. Петӧ тэнад синва?! Тӧдін? Но, эн бӧрд...» «Папа?! Кор нӧ, кытысь? Гортӧ волін, эн?» «Вола. Кузь на рытыс... Вина вайышт мен». Нина лигыш уси, Увлань лэдзис юр. Радлун сись моз кусі, Шуны кыв эз сюр. «Менам муса нылӧй, Сьӧлӧм батьлӧн жеб. Сёрнинад кӧть ылӧд, Чужӧмбан эн дзеб». Нина лэптіс юрсӧ, Синмас ӧзйис лӧг. Бушков тӧв оз кусӧд; Коссӧ шог оз чег. Быттьӧ кӧдзыд вой тӧв Гартӧ тані лым. «Вунӧдін кӧ горттӧ, Вунӧд менсьым ним. Эн лысьт шуны нылӧн: Пышйысь бать — не бать. Шуд кӧ кужин гуны, Кыскав шоглысь дадь». ________ Веж юрсиа нывка — Еджыд чужӧмбан! Ветлӧ, юсь кыдз кывтӧ, Пызан костӧд тан. Мукӧд пызан дорын Овлӧ Петляков. Синсӧ сылысь ёрӧ, Сувтлӧ сылӧн лов. Чӧвтлас Нина вылӧ Шогӧн тырӧм син. Сёрнитӧм эг кывлы Сэсся кыв ни джын.
