ВӦРЫН

Ывлаыс кӧдзыд,
Шутьлялӧ тӧв.
Коз улын кӧчыд
Пукалӧ чӧв.

Пукалӧ, шогалӧ:
«Тӧлыс зэв кузь;
Пӧттӧдз он сёйлы ни
Пӧттӧдз он узь.

Кӧть эськӧ шондіыс
Петіс ли мый!
Мед эськӧ вӧралысь
Менӧ эз кый!

Кӧть эськӧ, мед эськӧ,
Кӧть эськӧ, мед...
Ёсь пиня руч
Меным паныд эз пет!»

Ывлаыс кӧдзыд,
Шутьлялӧ тӧв.
Коз улын кӧчыд
Пукалӧ чӧв.

Пукалӧ, дивуйтчӧ:
Шондіыс гӧрд
Быгыльтчӧ, быгыльтчӧ —
Вомӧнтӧ эрд.

Казяліс — дзебсис
Сэк пыдӧджык кӧч:
Вӧлӧмкӧ, ручыд
Сэт котӧртӧ стӧч.