ЧОЯ-ВОКА
(Тӧвъяс)

Кытысь тӧлыс воис татчӧ,
Мый нин колӧ сылы тась?
Мыйла тадзи сійӧ гартчӧ,
Ставсӧ лэбӧдлыны дась?

Дзор Уралсянь сійӧ воис —
Лэбис уна вой да лун.
Воши сылӧн ичӧт чойыс.
Гортас чойтӧгыс оз мун.

Чойыс бать-мам дорсьыс пышйис,
Гортӧ овны бӧр эз лок.
Ӧні сійӧс тайӧ мыжсьыс
Кӧсйӧ нӧйтны ыджыд вок.

Кӧсйӧ гортас мырдӧн нуны,
Сэні вӧчны сылы суд,
Медым чойлӧн дзикӧдз вунӧ
Вӧльнӧй олӧм, ыджыд шуд.

Тӧвлӧн чойыс микӧд олӧ,
Вӧчӧ йӧзлы колан удж,
Ветлӧ-ворсӧ, мыйта колӧ.
Мыйсӧ сӧмын оз и куж!

Вартӧ, изӧ, чышкӧ, мыськӧ,
Скӧтнӧй дворӧ вайӧ ва,
Кукань вердӧ, мӧсъяс лысьтӧ.
Оз и шулыв: «Сёйны вай!»

Югыд шонді сійӧс вердӧ,
Сылысь шонтӧ ки и кок.
Дӧзмӧмысла горзӧ-бӧрдӧ —
Корсьӧ чойсӧ ыджыд вок.