ОТСАСИ ДА ВОДЗСАСИ

Батьлы талун отсаси,
Лӧдзлы, номлы водзсаси:
Батькӧд турун ытшким дыр,
Кытчӧдз ытшкантор эз быр.
Быдӧн ошкӧны: «Зэв бур!»
Тӧда ачым — тайӧ бур.

Батьлы талун отсаси,
Куканьяслы водзсаси:
Вердім батькӧд уна мӧс;
Вердӧм аддзылісны йӧз.
Быдӧн ошкӧны: «Зэв бур!»
Тӧда ачым — тайӧ бур.

Батьлы талун отсаси:
Косьтӧм торфӧн вольсаси;
Ӧткӧн батьлы абу лад —
Мунӧ вывті уна кад.
Быдӧн ошкӧны: «Зэв бур!»
Тӧда ачым — тайӧ бур.

Батьлы талун водзсаси,
Дай эг чеччы вольпасьысь,
Шебрас улӧ дзеби ныр.
Батьӧй ӧтнас ветліс дыр.
Некод оз нин шу: «Зэв бур».
Тӧда ачым — абу бур.