КОМИ ПЕСЕННӦЙ ТВОРЧЕСТВО ЙЫЛЫСЬ МЕДВОДДЗА ИССЛЕДОВАНИЕ

Неважӧн А. К. Микушев дорйис ассьыс докторскӧй диссертация. Сылӧн нимыс — «Коми сьылан фольклорлӧн артмӧм да кыптӧм» («Генезис и эволюция коми песенного фольклора»). Татшӧм диссертация! Шензянтор! Революцияӧдз кӧ кодкӧ кыпӧдіс сёрни коми песеннӧй фольклор да татшӧм тема вылӧ диссертация гижӧм йылысь, сэтшӧм морт вылас эськӧ кутісны вак-вакӧн серавны. Сэки ӧд вӧлі шуӧны, комилӧн пӧ абу некутшӧм оригинальнӧй сьыланкыв, ни кутшӧмкӧ фольклор.

Тадзи шулісны либӧ пемыд мывкыда йӧз, кодъяслӧн тӧдӧмлуныс этша вӧлі либӧ коми кывлысь да литературалысь сӧвмӧмсӧ падмӧдны зільысь йӧз. Кодсюрӧ, гашкӧ, и збыль думайтӧны: абу пӧ комиыдлӧн песеннӧй фольклорыс. Вӧлӧмкӧ, коми йӧзлӧн эм быд сикас сьылан фольклорыс, сӧмын колӧ вӧлӧм найӧс чукӧртны да тӧдмавны.

А. К. Микушев Коми филиалса мукӧд филологъяскӧд, гашкӧ, кызь во чукӧртіс сьыланкывъяс, балладаяс, бӧрдӧдчан кывъяс, героическӧй эпос, частушкаяс. Тӧдмасис тшӧтш фольклорнӧй материалъясӧн, кодъясӧс гижлӧмаӧсь ХІХ-ӧд да ХХ-ӧд нэмъясса учёнӧйяс революция водзвылын и революция бӧрын.

А. К. Микушев тайӧ озыр материалсӧ дас во чӧж тӧдмаліс теория боксянь: артмис ыджыд исследовательскӧй удж — докторскӧй диссертация. Диссертациясӧ дорйис Ленинградын, СССР-са наукаяс академиялӧн Роч литература институтын. Сэки уджсӧ донъялісны тадз: тайӧ медводдза и дзик ӧти исследование, кодӧс сиӧма йӧзкостса коми песеннӧй творчестволы. Диссертацияас кужӧмӧн тӧдмалӧма эпическӧй сьыланкывъяс да балладаяс, изьва-колваса багатырскӧй эпос да частушкаяс, вӧчӧма джуджыд анализ кык сё вося (ХІХ–ХХ-ӧд нэмъясса) материаллы. Диссертацияас авторыс медводз тӧдмалӧма местасӧ, кӧні кутшӧм фольклорнӧй произведение олӧ, важысянь-ӧ сійӧ артмӧма, кыдзи ньӧжйӧникӧн сійӧ сӧвмӧ да паськалӧ коми йӧз пӧвстын да с. в. Уджас уна выль материал.

Авторыс сравнивайтӧ сьылан коми фольклорсӧ мукӧд йӧзлӧн — ненецъяслӧн, карелъяслӧн, рочьяслӧн фольклоркӧд. Анализсӧ вӧчигӧн вайӧдӧ этнографическӧй да археологическӧй фактъяс. Тадзи тӧдмалӧ песеннӧй фольклорлысь артмӧмсӧ да историясӧ. А. К. Микушев диссертациялӧн тӧдчанлуныс зэв ыджыд: сійӧ — зэв колана содтӧд фольклор тӧдмалан наукаӧ, торйӧн нин коми фольклористикаӧ.

Колӧ нимкодьпырысь пасйыны, мый комиын ӧні эм литература кузя квалифицированнӧй учёнӧй.

1970