БАРА АДДЗЫСЬЛІМ
Мортыд унатор аддзылӧ нэм чӧжнас. Сылы нимкодь, кор аддзысьлӧ мусаторкӧд да мичаторкӧд. А кор паныдасьӧ лёкторкӧд да мисьтӧмторкӧд, сылы зывӧк лоӧ.
Миян коми поэзияын уна на эм сэтшӧм гижӧдыс, кодъясӧс лыддян да шензян: мыйла бара бумагасӧ лотӧны? Мукӧддырйиыс татшӧм гижӧдъяссӧ весиг торъя книгаясӧн лэдзӧны. Кор лыддян татшӧм книгаяссӧ, быттьӧ кывзан код юралысь мыкталӧмсӧ: кывйыс оз артмы, а шыбласьӧ зэв ыджыд лозунгъясӧн. Шог босьтлӧ сэки: матӧ 50 во нин ми сӧвмӧдам-лелькуйтам коми сӧветскӧй поэзия, а поэзия пыдди мукӧддырйиыс петӧны син пӧла дивӧяс, кодъяс быттьӧ кос сартас чегъялӧны да лёк горшӧн равзӧны.
Но оз ков ёна жугыльтчыны: ӧні этшаджык нин кутіс петны татшӧм дивӧыс, поэтическӧй халтураыс. Миян быдмисны да быдмӧны талантливӧй поэтъяс. Кор налысь кывбуръяссӧ лыддян, тэ аддзысьлан збыль поэзиякӧд, лыддян да нимкодясян авторыслӧн мӧвпъясӧн да сьӧлӧм кылӧмӧн.
Тадзи позьӧ донъявны и том поэт Владимир Поповлысь «Бара аддзысим» книгасӧ. Сэні 32 кывбур да 3 поэма. Ставсӧ, помсяньыс помӧдзыс, гижӧма мича кывйӧн, зэв колана темаяс вылӧ.
Авторыс кужӧмӧн вӧдитчӧ художественнӧя гижан сямӧн. Синмӧ шыбитчӧны тыр-бур рифмаяс, шыльӧдӧм-мольӧдӧм стихыс. Уна эм выль, оригинальнӧй рифма: Рӧдина — ӧти на, кӧть и — ньӧти, тэкӧд — век ӧд, арлань — чарла, ыджыд — мыджӧд, мичныс — вичмас да с. в. Бур рифмаыд ёна мичмӧдӧ кывбуртӧ! Кывбуръяссӧ гижӧма 70 лист бок вылӧ и пӧшти быдлаын стӧч рифма. Бура рифмуйтӧмсьыс шоча бокӧ кежлӧ: зіля — выльӧн, ныжмы — гижны.
Дерт, куш рифмуйтӧмнад кывбурыдлӧн оз на артмы мичлуныс да серпаслуныс. Владимир Поповлӧн кывбуръясыс озырӧсь метафораясӧн: «кыа сылӧ», «вояс кывтӧны тӧв ньылыд и тӧв паныд», «том шудсӧ гумовтны кӧш тыр», «шевгӧдӧма кияссӧ дзор коз». Мичмӧдӧма кывбуръяссӧ и шогмана сравнениеясӧн: «медым кыпыд вӧлі лолыд — йиысь мездмӧм ытва моз», «кодзув усис, биа сунисӧн енэжсӧ вурис...»
Ме ог вермы лыддьӧдлыны ставсӧ, кыдзи да кутшӧм ногӧн авторыс мичмӧдӧма да сӧвмӧдӧма кывбуръяссӧ. Шуа сӧмын, мый книгаас тырыс сӧстӧм да сӧдз лирика, кодӧс лыддян нимкодясигтыр. Со кӧть тайӧ:
Воча пӧльтӧ рытыв тӧлыс.
Матыстчӧ нин мӧдлапӧлыс,
Пыжлӧн туй сэн орӧ...
Сьывсьӧ тайӧ сьыланкывъяс,
Кыдзи лэччалісны нывъяс
Эжва юным дорӧ.
Коставлытӧг лыдди Владимир Поповлысь ичӧтик книгасӧ, лыдди да ышловзьӧмӧн шуи: бара аддзысьлі мича да сӧдз коми поэзиякӧд!
1966
