ОЗЫРЛЫ, САРЪЯСЛЫ ПОМ!

Коркӧ важӧн нин чужӧма му вылын Гундыр (рочӧн кӧ гидра-змея). Быдмӧма, ёнмӧма. Паськыд мусӧ сталь рушкунас песовтӧма, зэвтӧма.

Медыджыд ен пыдди лоӧма му вылын Гундыр. Ӧні став озырыс, сарыс кевмӧны сылысь, юрбитӧны, кесъялӧны зарни юра Гундырлы. Найясӧс Гундыр зарниӧн тыртӧ. Сы пыдди озыръяс пычкӧны гӧльяслысь медбӧръя вирсӧ, пӧрччӧны медбӧръя кучиксӧ.

Код нӧ крестьянаӧс гӧр дорысь нетшкӧмӧн-нетшкӧ, заводӧ вӧтлӧ? Код нӧ уджалысь йӧзӧс тшыгйыслы виӧ? Код вӧсна нӧ му пасьталаыс йӧзыслӧн шоръясӧн синваыс визувтӧ? Коді нӧ медбур, том, слава йӧзсӧ кад вотӧдзыс миллионъясӧн гуясӧ сюйӧ?

Ставыс гундырлӧн удж!

Ставнас бергӧдлӧ гундыр!

Сы пӧтлытӧм горшӧ шоръясӧн визувтӧ гӧльясӧн вир. Морт вирӧн тшӧгӧма паськыд рушкуа Гундыр. Сы, пеж горш, морт лысьӧмъяс вылын пасьвидзӧ: шогсӧ оз аддзы, матсӧ оз тӧд.

Гундыр му вылын медыджыд Сар,

Сылӧн нимыс — капитал.

Дыр-ӧ нӧ видзӧдам Гундырӧс?

Мувыв коньӧръяс — ӧтвывтчӧй!

Озырлы, саръяслы пуктылам пом!

Мед му пыр мунӧ капитал!

Мед вошӧ гундыр-капитал!

Тысяча ӧкмыссё дас нёльӧд воын озыръяс, саръяс, Гундырлы гажйӧн, му вылын лэптісны вӧвлытӧм кось. Кутісны озыръяс пурсьыны, юклыны ас костас уджалысь йӧзлысь медбӧръя овмӧссӧ. Кутісны гӧльяслысь жуглыны, пасьйыны керкаяс-чомъяс, кутісны коньӧръяслысь сотны чужан-быдман муяссӧ, вӧръяссӧ, грездъяссӧ, сиктъяссӧ.

Сыркӧны пушкаяс, сяркӧдчӧны морт виан машинаяс. Вольсалӧны тай йӧзӧс дзонь во чӧж. Сэсся мӧд во чӧж кисьтӧны вир. Коймӧд воас кӧ визувтӧ вирыс паськыд юясӧн. Тыртӧны гуяс, муяс, вӧръяс, чуркъяс, саридзьяс морт шуйясӧн нёльӧд во, бара кӧ дзоньнас.

Гундырлы, саръяслы, озырлы гажйӧн, на паськыд горш вӧсна!

Гӧгӧр виӧны, нӧйтӧны, пасьйӧны! Тупкасьӧны пабрикъяс, заводъяс. Быри вузӧс, эз кут сюрны нинӧм ньӧбны. Ставыс дас мында, кызь мында донсяліс. Деньгаыслӧн вытьыс соді, доныс чині.

Гӧрысьяслӧн эндісны муяс. Уджалысьыс чині, сёйысьыс соді.

Бӧрвылад сёяныд быри, паськӧмыд эз ло. Воисны тшыгъялан вояс. Тшыг вӧсна кутіс со паськавны висьӧм. Кынтӧ, шырӧ, вольсалӧ йӧзӧс...

Гундырлы, озырлы, саръяслы чӧсмасьӧм, номсасьӧм гажйӧн!

Гӧль йӧзлы, коньӧръяслы матысмис пом.

Весиг нин гӧльлы со овны оз позь!

Лэптылам, вокъясӧй, озыркӧд кось!

Пальӧдчӧй, уджалысь йӧз!

Мувыв коньӧръяс, ӧтвывтчӧй!

Озырлы, саръяслы пуктылам пом!

Мед му пыр мунӧ капитал!

Мед кыптас му выв революция!

Мед тыдовтчас югыд шонді — социализм!