МЫЙТА НА ЭСЬКӦ ВӦЧИС

Вениамин Тимофеевичкӧд ми вӧлім бур другъяс. Сыкӧд ме тӧдмаси 1921 воын Сыктывкарын, кор сійӧ локтіс уджавны Коми издательствоӧ. Но сы йылысь, кыдзи прогрессивнӧй мӧвпа морт йылысь, ме тӧдлі нин 1918 восянь, кор «Зырянская жизнь» газетын кутісны гижлывлыны Помӧсдінын культурно-просветительнӧй удж йылысь.

Сэки Тима Вень моз бура некод вӧлі оз тӧд коми кывсӧ. Сійӧ вӧлі тӧдӧ ёна бура коми йӧзкостса сёрнисӧ: шусьӧгъяс, кывйӧзъяс, нӧдкывъяс да с. в. Коми учебникъяс гижигӧн ми пыр вӧлі сылысь юасям, консультируйтчам. Сійӧ уна выль кыв вайис миян литературнӧй сёрниӧ, шуам кӧть: колипкай (соловей), идӧра (опрятный), мӧвп (мысль), мезд (свобода) да с. в. Татшӧм кывъяссӧ ми, дыр вензьӧм бӧрын, дерт, босьтлім литературнӧй кывйӧ. Тима Вень сэтшӧм пӧся да сьӧлӧмсяньыс дорйис татшӧм колана кывъяссӧ — нинӧм ми эг вермӧй сылы паныд шуны.

Тима Вень вӧлі Коми издательстволӧн сьӧлӧмыс и мывкыдыс. Сійӧ лыддьыліс миянлы ассьыс выль кывбуръяссӧ. Ми тшӧк ланьтӧмӧн кывзім сылысь «Тӧвйыв варыш» поэмасӧ, «Дорччысьяс» кывбурсӧ, «Вӧр лэдзӧм» прозаа кывбурсӧ да уна мукӧд гижӧдъяс.

Мыйтӧм эськӧ ещӧ на вӧчис бурсӧ Вениамин Тимофеевичыд! Но культ личности дырся нем жалиттӧм нӧш улӧ сюри. Томӧн ори сылӧн олӧмыс.

1964.

Москва