ЁГОР КОЛЕГОВ — КОМИ САТИРИК

Со кӧн вӧлӧм коми поэтыс, настоящӧй коми гижысь! Аслас гижӧдъясас («Крам праздник», «Кага видзӧм», «Миян грездса комитет» да с. в.) книгаысь нинӧм абу босьтӧма. Гижӧ, мый аслас синнас аддзылӧма, а гашкӧ, и ас мышку вывтіыс мунлӧма.

Нёбдінса Виттор кӧ коми йӧзӧс гажӧдысь, Ёгор Колегов — коми йӧзлысь омӧльторъяс сералысь. Ёгор Колеговлӧн сатираыс Демьян Бедныйлӧн сатира кодь, весиг ортсыса формаыс сылӧн кодь жӧ, босьтам кӧть «Вичко служба да проповедь».

Колеговлӧн сатира — коми сатира. Кывзӧй, кор коми морт кодӧскӧ кӧсйӧ серавны либӧ кодкӧ йылысь анекдот висьтавны, — сійӧ висьталӧ Колегов кывъясӧн.

Колегов гижӧ дженьыда, но уна висьталӧ, сылӧн быд кывбурын моздор тыр ним. Мукӧдлы кӧ коми крам праздник петкӧдлӧм могысь ковмис гижны быдса книга, Колеговлӧн гижӧма ӧти лист бокӧ и быттьӧ фотоаппаратӧн снимок вӧчӧма. Либӧ, шуам, «Кага видзӧм» нима кывбурын петкӧдлӧ семейнӧй сцена кызь-комын строчкаын, кодӧс эськӧ мӧд гижысьлы ковмис петкӧдлыны быдса книгаын.

Мукӧддырйи сӧмын рифма бӧрйӧм понда произведениелысь донсӧ ичӧтика уськӧдыштӧ. Со, шуам:

Тӧдан, шӧриа вӧд кага,

Видзышт ассьыд пайтӧ;

Эн пов, сюра, эн чайт кака, —

Висьтав «люлю-байтӧ».

Колегов — выль поэт, сӧмын на заводитӧ гижны. Ме чайта, ёнджыка кӧ кутас гижны, сыысь лоӧ миян коми Демьян.

1921