НЁБДІНСА ВИТТОР КОММУЫН ЛИБӦ КЫДЗИ ОЗ КОВ ГИЖНЫ УДЖАЛЫСЬ ВОЙТЫР ЙЫЛЫСЬ

«Ордым» журналлысь октябрса номер восьті да аддзи Нёбдінса Витторлысь серпастор «Коммуын» (Коми-Пермяцкӧй округӧд ветлӧм-мунӧм). Ачым мӧвпала: часлы, лыддьыштам асланым торйӧн олысь вокъяслӧн олӧм-вылӧм йылысь.

Лыддя, а... «туйыс»... помтӧм: Нёбдінса Виттор пароходӧн кывтӧ, сэсся поездӧн, сэсся бара пароходӧн, а сэсся телегаӧн. Любӧ тшӧтш, кутшӧм лӧсьыд пароходӧн катны. Зэв лӧнь, некутшӧм шум абу, сӧмын пароход кӧлесаяс шуасьӧны:

Нуа, ката Кама юӧд,

Ката тэнӧ Коми муӧ.

Лӧсьыд пароходнад катныыд, а телеганад сьӧкыд. Витторлысь лысьӧмсӧ бура и пыркӧдіс да километр сюръяясса «0» (нуль) синсӧ вежис. Коньӧр Виттор, гортад кӧ олін, лысьӧмыд эз пыркав, «0»-ыд синъястӧ эз веж да и Ваньӧ ордад куйӧд вывтіыд эз ков пыравны, лудікъяс эз сёйны. Зывӧкпырысь Паладьыдлысь йӧвтӧ эз ковмы юны. Коньӧрӧй Витторӧй!

Татшӧм вӧлӧма Витторлӧн «туйыс», сэсся заводитчӧ «удж». Коньӧр жӧ и Витторыд, уна и лёксӧ аддзылӧма. «Уджалігас» коньӧрӧс лудікъясыд кык вой вильӧдӧмаӧсь, шыръяс повзьӧдлӧмаӧсь, первой войсӧ электричество лампочкаыд абу вӧлӧма да. Тшыгтӧ овны сьӧкыд, а Витторлы лоӧма кык сутки тшыгъявны да нӧшта быдса лун виччысьны, мед завтракнас столӧвӧйын вердыштасны, коймӧд лунас эськӧ тшыгъялыштӧма нин да, енлы эскысь мортыдлы пекнича вӧлӧма да...

Унатор на Витторыд аддзылӧма. Со Юрлаад олӧмыс: «Ортсысяньыс видзӧдны, быттьӧ йӧзыс культурнӧя олӧны, а керка пытшкас няйт. Тані йӧзыс рочӧсь (?). Да, муртса эз вун: километр сюръяӧ тані бара пасйӧмаӧсь «0» (нуль)». Со либӧ Кӧчсьыд мунігад коммунаса столӧвӧяд завтракайтігӧн, «столӧвӧйтӧ эськӧ и мыськалӧмаӧсь да ёна на няйт гӧгӧр. Пырны лоӧ куйӧд вывті моз дай сёян дозмукыс абу дзик сӧстӧм». Сӧстӧм кӧть абу, зывӧкпырысь пӧди бара на лои сёйны!

Комму йывсьыд Витторлысь серпастортӧ лыдди да та мында и аддзи. Дерт, эськӧ уна гижӧма да сӧмын унджыксӧ ас йывсьыс: Виттор поездын, Виттор пароход вылын, Виттор телегаын, Витторӧс лудікъяс сёйӧны, Витторӧс шыръяс повзьӧдлӧны, Виттор завтрекайтны ӧчередь виччысьӧ, Виттор зывӧкпырысь йӧв юӧ, Виттор гижӧ выль пӧв «Станция Сыктывдінкар» кывбурсӧ да мукӧдтор вӧчӧ... Татшӧм вӧлӧма Витторлӧн ветлӧмыс. Мыйла эськӧ ме абу кинооператор, бур жӧ эськӧ кинокомедия лӧсьӧді!

Кодлы бара татшӧм гижӧдъясыд колӧны-а? Ӧд гижӧма сӧмын ассьыс похожденньӧсӧ да кыв-мӧд няйта олӧм йылысь. Позис жӧ ӧд мӧд ногӧн!

1929