«ОРДЫМ» ЙЫЛЫСЬ
Петіс «Ордым» журналлӧн витӧд номер, 72 лист бок. Юксьӧ вит пельӧ: индӧд-туйдӧд статьяяс, художествоа литература, критика, хроника, челядьлы лыддянъяс. «Ордымӧ» гижӧны морт 25 кымын. Сьӧлӧмтӧ кыпӧдӧ, кор аддзан та мында гижысьӧс ӧти номерысь. Эмӧсь сэні пӧрысьджык гижысьяс (Юсь), шӧр нэма (Сизь Паш), эмӧсь том гижысьяс. Век жӧ пӧрысьджык гижысьясыс этша на гижӧмаӧсь тайӧ номерас. (Воддзаджык номеръясас торйӧн нин этша гижлісны.)
КАПП-ыд «Ордым» бердад ёна нин вермӧма котыртны гижысьястӧ. Художество боксянь «Ордымӧ» гижысьяс ёна нин кыптӧмаӧсь. Том гижысьяс тӧдчымӧн быдмисны во-мӧдӧн.
Кутшӧм выльторъяс тайӧ номерас? Медводз агитпроплӧн «Ордым» журнал йылысь шуӧм. Медшӧр индӧдыс сэні со кутшӧм: идеология боксянь мед вӧліны бурӧсь гижӧдъясыс, мед вӧлі бур критика да хроника юкӧн. Критикаыд миян ёна на жеб, зэв ляпкыд, вевдорсяньыс инмыштӧ сӧмын. Колӧ ён (здоровӧй) критика, коді видлалӧ гижӧдъяссӧ пыдісянь, паськыда. Художественнӧй гижӧдъяслӧн форма боксянь пӧшти эз на вӧв некутшӧм критика. Коми литература сӧвмӧм йылысь эз на жӧ вӧв некутшӧм гижӧд. Тайӧ номерас на абу и. Абу и литературнӧй организация удж йылысь хроника. Ми эгӧ тӧдлӧй, мый вӧчисны коми-пермяцкӧй гижысьяс, Москваын олысь КАПП-са членъяс, «Коми комсомол» газет бердын кутшӧм литературнӧй удж котыртӧма, эз вӧвны юӧртӧмъяс киӧн гижӧм литература журналъяс да стенгазетъясын литература юкӧнъяс йылысь. Став сикас литературнӧй уджсӧ «Ордымлы» колӧ тӧдны и йӧзсӧ тӧдмӧдны.
«Ордымлӧн» витӧд номерын мӧд выльтор — киӧн гижӧм литературнӧй журналъяс йылысь Выль Пашлӧн статья. Тайӧ зэв ыджыд воськов водзӧ литературнӧй удж котыртӧмын.
Коймӧд выльтор — «Ордымлӧн» воддза номер йывсьыс Сан Антуслӧн статья. Критик видлалӧ сӧмын некымын гижӧд. Колӧ эськӧ босьтны став гижысьясыслысь произведениеяссӧ, видлавны найӧс содержание и техника боксяньыс. Водзӧ кежлӧ «Ордымлы» колӧ ёнмӧдны критика юкӧнсӧ — не пинясьӧм-этшасьӧм, не кывйӧ крукасьӧм да няйтысь гез кыӧм ради, а бур боксянь выдержаннӧй, джуджыд критика сӧвмӧдӧм ради. Мед быд гижысь тӧдас — мыйӧн бур да мыйӧн жеб сылӧн гижӧдыс. Колӧ тшӧтш бурмӧдны и хроника юкӧн, мед йитны, ӧтувтны став коми литература уджсӧ.
1929
