МОСКВАСА КОМИ СТУДЕНТЪЯС ПӦВСТЫН

Тавося арӧдз Москваын велӧдчысь студентъяслӧн вӧлі кык организация: землячество да Коми му тӧдмалан обществолӧн филиал. Сӧмын уджыс некодыслӧн эз тырвыйӧ лючки мун. Землячествоыс сӧмын деньга юклӧмӧн ноксис, филиалыс сӧмын история да этнография вопросъяс видлаліс.

Арнас лои реорганизация: землячество да филиал ӧтувтчисны. Лои Коми му тӧдмалан (краеведческӧй) землячество. Сійӧ юксис вит секция вылӧ: 1) экономическӧй, 2) культурно-социальнӧй, 3) историко-этнологическӧй (тайӧ куимыс краеведческӧй секцияяс), 4) массовокультурнӧй да 5) сьӧм юклан секция.

Реорганизация бӧрын землячество пыр жӧ босьтчис уджӧ. Медводдза уджыс вӧлі мукӧд каръясса землячествоясӧс ордйысьны чукӧстӧм. Ордйысьӧм кузя договорын медшӧр пунктъясыс — Коми му тӧдмалӧм, Комиӧ уджавны мунігкежлӧ лӧсьӧдчӧм да с.в. Лозунгыс миян: землячествоын мед эз вӧв ни ӧти уджавтӧм член!

Секцияяс лӧсьӧдісны уджалан план и уджалӧны нин нёльӧд тӧлысь. Экономическӧй секция (сэні 25 морт) вӧчис куим доклад, культурно-социальнӧй (12 морт) — кык доклад. Массовокультурнӧй секция нуӧдіс кык рыт. Таысь кындзи, вӧлі землячестволӧн нёль общӧй собрание. Сэсся уджалӧ коми словарь лӧсьӧдӧм могысь коми кыв чукӧртан комиссия. Землячество бердын жӧ уджалӧ КАПП-лӧн Москваса чукӧр (7 морт).

Мукӧд каръясса коми землячествояс! Газет пыр тӧдмӧдӧй асланыд уджӧн да олӧмӧн.

1930