ВЕЛӦДӦНЫ ЧУЖАН КЫВ

Коми литература да искусство сӧвмӧдӧмын ыджыд тӧдчанлун сетсьӧ талунъя том йӧзлы, школаын велӧдчысь коми ныв-зонлы, найӧс быдтысь-велӧдысьяслы. Та кузя ыджыд удж нуӧдӧ Сыктывкарса университетлӧн коми кыв да литература кафедра, сэтчӧс велӧдысьяс — профессор А. К. Микушев, доцент В. В. Пахорукова, А. Н. Карманова да мукӧдъяс. Найӧ пыдісянь тӧдмӧдӧны студентъясӧс коми кыв да литератураӧн, тӧдмӧдӧны мукӧд финно-угорскӧй кывъяслӧн ӧткодьлунӧн.

Университетса студентъяскӧд топыд йитӧд кутӧны школаясса учительяс, районъясӧн веськӧдлысьяс. Колӧ пасйыны КПСС Усть-Куломскӧй райкомса первой секретар М. К. Игнатовӧс, коді быд во аддзысьлӧ университетса студентъяскӧд, тӧдмӧдӧ найӧс район сӧвмӧдан планъясӧн, том специалистъяслӧн уджын позянлунъясӧн. И дерт, та вӧсна тшӧтш Кулӧмдін районысь медуна воӧ том йӧзсянь университетӧ пырӧм йылысь шыӧдчӧмыс.

Бур кывйӧн колӧ пасйыны школаса учительяслысь уджсӧ. Сідз, Усть-Немса шӧр школаын уджалӧ Нина Михайловна Гуляева. Сійӧ мӧдӧдӧма таво университетӧ куим абитуриентӧс. На пиысь Лида Мамонтовалӧн аттестатас унджык оценкаыс «5». Тайӧ нывсӧ примитісны велӧдчыны кык экзамен сдайтӧм бӧрын. Кӧрткерӧсскӧй районса Сторожевскӧй средньӧй школаысь кыв велӧдысьыс Татьяна Ивановна Королева туйдӧма СГУ-ӧ кык велӧдчысьӧс. На пиысь ӧтиыслӧн, Наташа Даньщиковалӧн аттестатас пӧшти ставыс «5». Кык воддза экзаменсӧ ныв сдайтіс «5» вылӧ жӧ да срокысь водз лои студенткаӧн.

Туис-Керӧсса школа помалысьяс пӧвстысь, литература да кыв велӧдысьыс Гаяния Васильевна Поповцева, унаӧн нин велӧдчисны СГУ-ын. А тавося выпускница Н. В. Шинелева помаліс университет отличницаӧн. Сійӧ ӧні велӧдӧ Уфа карса институтын коми артистъясӧс. Мӧд курсын велӧдчӧ Евгений Козлов, коді тшӧкыда йӧзӧдлӧ «Войвыв кодзув» журналын ассьыс кывбуръяс да висьтъяс.

Заводитчис выль велӧдчан во. Сиам учительяслы, коми кыв да литература велӧдысьяслы, студентъяслы выль вермӧмъяс. Медым найӧ и водзӧ кыпӧдісны челядь сьӧлӧмын чужан кыв дінӧ муслун.