ТОМ МОРТАЛАН ПАСЬКӦМ

Существительнӧйысь глагол артмӧ суффиксъяс отсӧгӧн, кодъяс сетӧны глаголлы выль рӧм, тӧдчӧдӧны действиелысь мунӧмсӧ, качествосӧ, урчитӧмсӧ. Шуам, -ав- суффикс тӧдчӧдӧ, мый кыв вужйын индӧм предметсӧ пуктӧны мӧд предмет пытшкӧ: сов — солавны, кӧм — кӧмавны, нур — нуръявны; -ась- суффикс векджык петкӧдлӧ сэтшӧм действие, коді вуджӧ действие вӧчысь вылас: кӧм — кӧмасьны, вӧнь — вӧнясьны, кизь — кизясьны.

Суффикс отсӧгӧн глагол вермӧ артмыны оз сӧмын ӧтка существительнӧйысь, но и дзонь кывтэчасысь. «Алӧй лента» романын В. Юхнин гижӧ: «Илля рыт кежас том морталан паськӧмасис». Тані глаголыс артмӧма абу сӧмын паськӧм кывйысь, код дінӧ содтысьӧ -ась- суффиксыс, но дзоньнас «том морталан паськӧм» кывтэчассьыс: паськӧм кывлы том морталан мунӧ определенньӧ пыдди.

Улын сетӧм примеръясысь корсьӧй кывъяссӧ, кодъяс артмӧмаӧсь -ав-, -ась- суффиксъясӧн, висьталӧй, кутшӧм кывтэчасъясысь артмӧмаӧсь тайӧ глаголъясыс.

1. Никодим чужан лун кузяыд лӧз клеткаяса шӧвк дӧрӧмасис, моднӧй гачасис. 2. Вӧскресенньӧ рытӧ Ӧксеныд еджыд дӧрӧмасяс, моднӧй гачасяс, вӧччас кыдз колӧ. 3. Ышмис Никодим, видзӧдліс войтланьыд да. Кринча помысь и тінькнитіс юис кӧдзыд йӧв, брезент плащасис, коскас зэвтіс патронташ да уськӧдчис керкаысь. 4. Министерствосянь ыстісны Коноплёвӧс Сьӧдвадйӧ: «Участкӧвӧй инспекторав пӧ, лӧсьӧд сиктас колана пӧрадок». 5. Коноплёвлы любӧ лои: олӧма йӧз, а пыдди пуктӧны том мортӧс: пасибӧасис да чеччис, плащасис. (В. Б.)