ВАСА ДА ВӦРСА

Тшӧкыда существительнӧйяс (латинскӧй ног — субстантив) лыдӧ вуджӧны мукӧд кывсикасъяс, кодъяс босьтӧны существительнӧйлысь признакъяссӧ. Татшӧм вуджӧмыс шусьӧ субстантивацияӧн. Тшӧкыда субстантивируйтчӧны причастиеяс — глаголысь артмӧм кывъяс. Босьтам пывсян кыв. Кор ми шуам либӧ кылам сійӧс, тӧд вылӧ усьӧ керка, кӧні пывсьӧны. Ачыс пывсян кывйыс миян вежӧрӧ пырӧма кыдз существительнӧй. Миянлы дум вылӧ оз во шуны «пывсян керка», кӧть войдӧр сідз и шулӧмаӧсь, кыдз ӧні нимтам: уджалан кӧм-пась, вӧралан керка, узьлан вежӧс. Пывсян, узьлан, вӧралан, уджалан кывъяс форма сертиыс причастиеяс, артмӧмаӧсь глаголъясысь -ан суффиксӧн. Но пывсян причастие ёна нин важӧн вуджӧма существительнӧйӧ, босьтӧма сылысь признакъяссӧ: вежласьӧ падеж серти (пывсянлӧн, пывсянлысь, пывсянӧ), лыд серти (пывсянъяс), босьтӧ притяжательнӧй суффиксъяс (пывсяныд, пывсяныс). Мукӧд причастиеяс, кодъяс абу вуджӧмаӧсь существительнӧйӧ, оз босьтны существительнӧйлысь признакъяссӧ (лыд, падеж, притяжательнӧй суффиксъяс).

Важӧн нин вуджӧма существительнӧйӧ чушкан причастие, диалектъясын шуӧны — чушкысь. «Чушкан али мый чушкис?» — гижӧ В. Безносиков «Свӧякъяс» нима повестьын, кӧть сатирическӧй журнал шусьӧ «Чушканзі», оз «Чушканӧн».

Существительнӧйӧ жӧ вуджисны жыннян (кӧлӧкӧл), берган (вертушка), ворсан (гармонь) да мукӧд кывъяс, кодъясӧс огӧ нин лыддьӧй причастиеӧн, ӧд на дінӧ оз сувтӧдсьыны существительнӧйяс.

Писательяс синонимика озырмӧдӧм могысь активизируйтӧны субстантивируйтӧм причастиеяссӧ, кодъяс бергалӧны йӧзкост сёрниын. В. Безносиков гудӧк кывлы орччӧн вайӧдӧ ворсан: «Никодим эз кут пыксьыны, диван улысь судзӧдіс гудӧксӧ, небыд тасмасӧ волысаліс пельпомас, чуньяснас котӧртӧдіс еджыд кизьясӧдыс. Ворсаныс важ моз на кывзысис гудӧкасьысьлысь».

Медым артмӧдны стӧчджык серпасъяс, писательяс лӧсьӧдӧны выль существительнӧйяс причастиеясысь. Сійӧ жӧ «Свӧякъяс» повестьысь лыддям: «Старшина кӧсйис нин ковгыны пеж гортса пӧткаӧс аслас лыянӧн, но торкисны: Ботан Ӧксен тыдовтчис». Авторыс лыйны глаголысь -ан суффиксӧн артмӧдӧ причастие, коді мунӧ «пистолет» кыв пыдди. Причастие бердын абу некутшӧм определяйтан кыв (кӧрт либӧ чача). Лыян мунӧ существительнӧй пыдди, сулалӧ керанторъя падежын.

Вӧрса да васа (кульяс), гозъя (йӧз), тыла (сотӧм му) — прилагательнӧйысь вуджисны существительнӧйӧ. Тыла-ын дзебсясьӧ важ кыв вуж — тыл (би). Тыла — биа му. Финн-угор кывъясын ӧні на бисӧ шуӧны: тул (удмуртъяс), tuulі (финнъяс), tűz (венгръяс). Му кывсӧ вӧчасӧн эз кутны шуны, и тыла кыв вуджис существительнӧйӧ. Тадзи жӧ прилагательнӧйясысь вуджисны существительнӧйӧ вӧла морт пыдди — вӧла, вӧла-доддя, пыжа йӧз пыдди — пыжаяс, кӧра войтыр пыдди — кӧраяс, югыд кизя — важъя чиновникъяс йылысь...

Субстантивируйтӧм кывъяс озырмӧдӧны йӧзкост сёрнилысь синонимикасӧ, отсалӧны тэчны стӧчджык динамичнӧй образъяс, содтӧны кывлысь художественнӧй позянлунъяссӧ.

1. Лыддьӧй кывбурсӧ да думыштӧй, кутшӧм грамматическӧй явление вӧсна он дзик пыр гӧгӧрво, мый йылысь тані висьтавсьӧ.

Луныс быри, воши,

Помтӧм лои вой.

Локтіс еджыд тошка

Кӧдзыд, би кодь збой,

Дорис юяс, шоръяс,

Вӧчис йиа пос,

Чирсіс пулысь коръяс,

Лои гӧгӧр кос. (М. Л.)

2. Корсьӧй субстантивируйтӧм кывъяссӧ вайӧдӧм текстъяссьыс.

а) Йӧра

Кузь кока, сизим вожа сюра —

Пу костӧд аддзи сійӧс бура.

И сійӧ бура менӧ аддзис,

Но пелысь гӧгӧр ветліс надзӧн,

Том небыд йывсӧ сёйис чӧла.

А менам ӧтка пуля вӧлі.

Но ме эг лый, кӧть верми эськӧ,

А сійӧ менам бурӧ эскис. (Г. Ю.)

б) Кымынӧн сэн висьысь пӧрысь аньыс,

Кодъяслы эз вичмыв олӧм шаньыс!

Шогыс налы быттьӧ лолі ныма.

Найӧс эськӧ мӧдӧдлыны Крымад! (Г. Ю.)

в) Гашкӧ и тадз ставыс олӧмас колӧ,

Бурыс и лёкыс мед тэ дінӧ волӧ.

Лёктӧгыс бурсӧ морт омӧля тӧдас,

Овны да уджавны кутас сэк сьӧдас. (А. Миш.)