КӦЧИЛЬӦЙ ДА ЧОЙИЛЬӦЙ

Медым петкӧдлыны, ёна-ӧ кажитчӧ сёрнитысьлы висьталанторйыс, сійӧ вӧдитчӧ донъялан вежӧртаса суффиксъясӧн, кодъяс вермӧны тӧдчӧдны сёрнитысьлысь лелькуйтӧм, жалитӧм, ичӧтмӧдӧм, пыдди пуктӧм либӧ омӧльтӧм, зывӧктӧм да с. в.

Татшӧм сикас кыв юкӧнъясыс ловзьӧдӧны висьтсӧ, кыскӧны вниманньӧсӧ кывзысьяслысь, мичмӧдӧны кыв сёрни.

Вайӧдӧм примеръяссьыс корсялӧй донъялан вежӧртаса суффиксъяссӧ да висьталӧй, кутшӧм рӧм найӧ сетӧны кывйыслы.

а) Кокӧнь, кокӧнь, котрав

Чӧдъя-пувъя ягъясті,

Озъя тыла вӧръясті,

Мырпома нюръясті.

Кокӧнь, кокӧнь, котрав

Сэтӧра войтъясті,

Ельдӧга расъясті,

Мамыдлы вай тусь да тшак.

(Фолькл.)

б) Важ керкуньыд выль дорын быттьӧ пӧчӧ том ичмонькӧд. (Г. Ф.)

в) — Депутаткаыд воис да чайті, талун огӧ нин пондӧй тачкаӧн куйӧдтӧ кыскавны, а сійӧ ачыс, видзӧдлӧй, кекӧньяснас жӧ куйӧдтӧ сӧвтӧ. (Н. К. )

г) Ни ӧти ув оз тречнит кок улын, ньӧтчыд ва оз бузнитлы. Мися кӧчильӧй, тэ кӧть и мудер, ме абу жӧ йӧй! (И. Т.)

д) Гуранӧн йирӧма кодкӧ посни пиньтуя. Дерт, шыр! Шабді вый сорӧн вӧчӧны изоляциясӧ, и петӧма вежыс гыжгунлӧн. (Г. Ю.)

е) Сиктад кысільӧйыдлы майбыр: и паччӧртӧ на эз косявны, и шырыд тырмӧ, и йӧвтӧ кисьтӧны веськыда пӧдӧнчаысь.

ж) Со кутшӧмкӧ пӧч котӧртӧ кузь дом йылӧ кӧрталӧм еджыд кутю бӧрся. Понйыс ичӧт на, сылы окота ворсны. И пӧчыд, коньӧрушкаыд, пӧсь петтӧдзыс котралӧ кычи бӧрся. (Ю. т.)

з) — Кильчӧ вывсянь на, видзӧда да, код, мися, татшӧм сюсясӧ и зібъясьӧ-а... Ӧльӧксан вӧлӧма! Ваас мӧй усьлін — кутюшка-ва? (Б. Ш.)

и) — Тэ, Ирук, — шуӧ пӧч, — киськав ӧшинь увсьыд дзоридзьяссӧ. — А ме, пӧчук, — шуӧ Настук, — корӧсь кӧтӧда да джодж чышка. (Войт)