КЕККОНЕН ЙЫЛЫСЬ ТЕШЪЯС

Финляндияса президент Урхо Кекконен йылысь олігас на вӧлі висьтавлӧны гажа висьтъяс-анекдотъяс. Гажа висьтъяса небӧгъяс петавлісны Финляндияын, и налы водзкывсӧ весиг гижліс ачыс Кекконеныс, эз дӧзмыв сы йылысь тешъяс лӧсьӧдлӧмысь.

1. Войвыв Финляндияын (Лапландияын) веськаліс ӧтчыд Кекконен крестьянин гозъя ордӧ.

Кӧзяева пуксьӧдісны ыджыд гӧстьӧс еджыд пызандӧраӧн мичмӧдӧм пызан сайӧ гӧститӧдны.

Копей юигӧн Кекконенлӧн кисьыс усис чашкаыс да копейыс лякӧсьтіс пызандӧрасӧ. Президент кутіс корны прӧща кӧзяйкалысь, но ань вежавидзӧмӧн шуис:

— Оз ков та вӧсна майшасьны, кокньыда мыськыссяс пызандӧраыс.

Недыр мысти и кӧзяин киысь усис чашкаыс да копейыс киссис пызан вылас.

Кӧзяйка оз вермы кутчысьны да чирыштас верӧссӧ:

— Тэ тані менам мӧд бӧлбан пукалан.

Вежон мысти тайӧ сиктас воис Хельсинкисянь пӧсылка. Кӧзяйка восьтас кӧрӧбкасӧ да перъяс сэтысь выль пызандӧра. Кӧрӧбас вӧлі кабалатор вылӧ гижӧма: «Медводдза бӧлбансянь».

2. Лапландияын Кекконенлӧн вӧлӧма дача, кӧні сійӧ коллявлӧма гожся шойччан лунъяссӧ. Ӧтчыд сійӧ ломтас пывсян да шыасяс суседыс дорӧ, лок пӧ тшӧтш пывсям, а сы бӧрын ужнайтам ӧтлаын.

— Аттьӧ корӧмсьыд, но менам вир-яйӧй оз на луд, а кынӧмӧй оз на жӧ сюмав, — пыксяс корӧмсьыд мортыд.