ПӦЧ

(Финскӧй мойд)

Муніс ӧтчыд гӧль нывбаба вӧрӧ вотчыны. Вӧрын сійӧ паныдасис дас кык авъя том морткӧд, кодъяс вӧліны вокъяс. Вокъяс юалісны аньлысь: «Висьтав жӧ, дона пӧч, волӧн кутшӧм тӧлысь медся мича?» Нывбаба вочавидзис: «Мичаӧсь найӧ ставныс. Февральын усьӧ небыдик, еджыдик лым да челядь котралӧны лызьӧн. Майын пуяс вевттьысьӧны веж коръясӧн, юльын кисьмӧны вотӧсъяс, ноябрын челядь исласьӧны дзирдалысь йи вывті. Збыльысь, дас кыкнан тӧлысьыс, ме ногӧн, ӧткодь мичаӧсь». Вокъяслы лои нимкодь, да найӧ шуисны:

— Тэ бур сьӧлӧма пӧч, миянлы окота сетны тэныд мыйкӧ.

И найӧ тыртісны аньлысь чумансӧ зарни сьӧмӧн. Пӧч аттьӧаліс найӧс сьӧлӧмсяньыс да муніс гортас.

Кор нывбаба воис гортас, зарни сьӧмӧн тыр чуман йывсьыс регыд тӧдмаліс сиктыс ставнас. Аскинас сы дінӧ локтіс суседысь нывбаба юасьны, кытысь сылы сюри сьӧмыс. Гӧль нывбаба вочавидзис сьӧлӧмсяньыс:

— Эска, мый и тэныд сюрас сьӧмыс. Босьт чуман да мун вӧрӧ, сэтысь тэ быть паныдалан 12 вокӧс. И дерт жӧ, найӧ тэныд сетасны зарни сьӧм, кыдзи и меным.

Суседса нывбаба босьтіс ыджыд чуман да мӧдӧдчис вӧрӧ. Регыд сійӧ воис сійӧ местаӧ, кӧні 12 вок олісны. Вокъяс юалісны и тайӧ нывбабалысь: «Висьтав, зарни пӧч, волӧн кутшӧм тӧлысь медся мича». Нывбаба вочавидзис: «Медся мича тӧлысь? Ставсьыс? Найӧ ставныс шогмытӧмӧсь! Юльын вывті пӧсь, сентябрын зэрӧ, ноябрын сэтшӧм вильыд, мый йӧз усялӧны туй вылас, январын — пашляк лыйсьӧ. Збыльысь, став 12 тӧлысьыс, ме ногӧн, ӧткодь лёкӧсь».

Вокъяс шогӧ усисны, но шуисны: «Вайлы чумантӧ, кӧсъям мыйкӧ сетны тэныд». Нывбаба тэрыба мыччис вокъяслы ыджыд чумансӧ, да вокъяс тыртісны сійӧс зарни сьӧмӧн. Ань сэтшӧм тэрыба мӧдӧдчис гортас, мый весиг эз аттьӧав вокъяссӧ. Гортас нывбаба пуктіс чумансӧ пызан вылӧ да горӧдіс:

— Эй, ставӧн! Локтӧй видзӧдлӧй, мый жӧ ме вайи вӧрысь бурсӧ. Восьтіс чумансӧ, но мый жӧ сэні вӧлі? Сэні зарниыс пыдди вӧлі сӧмын тырыс посни из.