ТУТУРУТУ

Словарьясын тайӧ кывйыс абу, но сійӧ гӧгӧрвоана коми мортлы.

Тутуруту Семӧ сайӧ

Ӧгрӧ Марпа верӧс сайӧ,

Майбыр, муніс...

Тадзи заводитчӧ Нёбдінса Витторлӧн лӧсьӧдӧм сьыланкыв. «Ту-ту-ру-ту» шыясыс кокниа петӧны вомысь, кор мортлы кокни лов вылас, кор сійӧс нинӧм оз майшӧдлы. Но век кӧ кутан «ту-ту-ру-ту» сьывны, йӧзыс вермасны мӧвпыштны, мый тэ нем думайттӧм, кокни сяма морт, сьыланкывса Семӧ кодьыд жӧ. Ӧд Семӧыд тӧлкӧн ни уджавны, ни шойччыны оз куж. Удж вӧчӧм пыдди сійӧ век ворсӧ вомнас, а аслас пир вылысь, кӧні став рӧдвужыс гажӧдчӧны, Семӧ мунӧ... кӧч кыйны да вӧралігас воштӧ весиг ассьыс шудтӧм юрсӧ.

Тутуруту Семӧӧс,

Кӧч кыйысь мужикӧс,

Гӧтырыс аддзис

Мӧс видзан давйысь...

Гӧра вывсянь чеччыштӧма,

Став лысьӧмсӧ крӧшитӧма.

Тутуруту — тадзи дженьыда да стӧча Нёбдінса Виттор нимтӧма ассьыс мывкыдтӧм геройсӧ. Тайӧ нимыс топыда пуксис и талунъя кокни сяма войтырлы.