КЕРАНТОРЪЯ ПЫДДИ ӦТВЫВТАН

Действие вӧчан предметсӧ ми нимтан инструментӧн. Инструмент петкӧдлысь кывсӧ ми векджык сувтӧдам керанторъя падежӧ, шуам: вайны ва ведраӧн, чышкыны джодж роскӧн, исласьны даддьӧн да с. в.

Керанторъя падежын сулалӧны и гортса пемӧсъясӧс нимтысь кывъяс, кор ми пасъям, мый найӧ отсалӧны нуӧдны гортгӧгӧрса удж: вӧлӧн гӧрны, мӧскӧн да куканьӧн овны (видзны мӧска-куканя), понйӧн вӧравны да с. в.

Йӧзкост сёрниын да художествоа гижӧдъясын пемӧс нимтысь кыв вермӧ лоны ӧтвывтан падежын:

«Рытын, шоныд гор би дорын,

Урлысь кучик кулян,

Кыкӧн понкӧд, муса другкӧд,

Сёрнитан да ноксян», —

гижӧ Тима Вень вӧралан пон йылысь, поэт зільӧ тӧдчӧдны, мый сылӧн понйыс — дзик ӧтка ловъя лов, кодлы вӧр керкаын кыйсьысьыс вермӧ мыйкӧ шуавны, а сійӧ водзӧссӧ легӧдӧ бӧжнас либӧ нюлышталӧ небыд кывнас кӧзяинлысь кисӧ. Кыйсьысьлы понйыс медъёна отсасьӧ вӧрын, авторыс любӧпырысь нимтӧ сійӧс муса другӧн, а оз лыддьы сӧмын горт видзысьӧн да пемӧс-пӧтка увтысьӧн. Понйӧс вылӧ донъялӧмыс тыдовтчӧ сылысь нимсӧ ӧтвывтан падежӧ сувтӧдӧмын.

«Локтас Кельчипи Тарас,

Коді олӧ юкӧд-тыкӧд

Куль моз, кодлӧн чери сьӧм

Ӧтторъя пыр кутчысьӧм

Ныр-вомас...»

«Ю да ты» (ловтӧм предмет петкӧдлысь кывъяс) ӧтвывтан падежӧ сувтӧдӧмӧн Иван Куратов зільӧ тӧдчӧдны, мый юыс да тыыс Кельчипи Тараслы — медся матысса ёртъяс, ӧд чери кыйӧмыс — Тараслӧн медшӧр удж, ю дорын коллялӧ сійӧ олӧмлысь ыджыдджык юкӧнсӧ. Сійӧ оз прӧста ов ва дорас, а сюся видзӧдӧ сы бӧрся, весалӧ юсӧ да тысӧ вӧйӧм вужляясысь, быд сикас лӧпсьыс, шыӧдчӧ мелі кывйӧн ваыс дінӧ, мед козьналас сійӧс неуна чериӧн. Та вӧсна чери кыйысьлы юысь да тыысь мусаджыкыс да матысджыкыс некод и абу.

Медым юӧртны, мый юысь да тыысь перйӧ кынӧмпӧтсӧ Тарас, позьӧ вӧлі нейтральнӧй стильӧн шуны: юӧн да тыӧн олӧ, кыдзи шуам, мӧскӧн пӧ олӧ либӧ ыжйӧн-порсьӧн.

Но ӧтвывтан падежӧ юкӧд-тыкӧд эмакывсӧ сувтӧдӧмӧн поэт дженьыда да стӧча серпасалӧ геройлысь оласногсӧ, вӧчӧ Тарасӧс лыддьысьысьлы гӧгӧрвоанаджыкӧн, дай матысджыкӧн.