НИМТАН ПАДЕЖ ПЫДДИ АСАЛАН

Сёрникузяын действие вӧчысь подлежащӧй век сулалӧ нимтан падежын. Но овлывлӧ, мый йӧзкост сёрниын, дай художествоа гижӧдъясын действие вӧчысьсӧ сувтӧдӧны и асалан падежӧ:

— Тӧв кежлӧ ошлӧн водзвыв вӧлі дасьтӧма гу.

Чӧртлӧн додь пыдӧсас пуктӧма кутшӧмкӧ тубрӧд.

Лэбачлӧн пес чипас костӧ вӧчӧма поз.

Вайӧдӧм сёрникузяясас ош, чӧрт, лэбач кыв формаяс пыдди вайӧдӧмаӧсь: ошлӧн, чӧртлӧн, лэбачлӧн...

Асалан падежа кыв формаяс мунӧны действие вӧчысьӧс нимтӧм могысь (ӧд збыльысь гусӧ дасьтӧма ош, тубрӧдсӧ пуктӧма чӧрт, позсӧ тэчӧма лэбач). Ми казялам, мый асалан падежа кывйӧн действие вӧчысьсӧ петкӧдлӧмыс сетӧ юӧртӧмыслы аслыссикас рӧм: ми быттьӧкӧ вӧчӧмсӧ аддзам боксянь, либӧ быттьӧ миянлы кодкӧ юӧртӧ ас нимсяньыс действие йывсьыс, кутшӧмӧн сійӧ тыдовтчӧ висьталысьыслы.

Грамматикаын тайӧ кыкнан падежыс ворсӧны ӧткодь роль — нимтӧны субъектсӧ — действие вӧчысьсӧ, сӧмын найӧ торъялӧны рӧмъяснаныс. Нимтан падежа формаыс сетӧ юӧртӧмыслы нейтральнӧй рӧм, мӧд кывйӧн кӧ, сійӧ сӧмын пасйӧ субъектсӧ, но некутшӧма оз донъяв. А асалан падежыс вӧчӧ юӧртӧмсӧ мӧд ногаджык — быттьӧ бокисянь видзӧдӧмӧн аддзанаӧн, и та вӧсна кывзысьыслӧн либӧ лыддьысьысьлӧн чужӧ аслыссикас ру, кутшӧмӧн овлӧ ёна тӧдсатор, бура гӧгӧрвоанатор йылысь сёрнитігӧн.