«СЁРНИТЫШТАМ, ЁРТӦЙ!»
Татшӧм ним сетӧма филологияса доктор Йӧлгинь Цыпанов аслас выль небӧглы, кодӧс сиӧма верстьӧ лыддьысьысьлы, комиӧн сёрнитны велӧдчысьлы.
Таӧдз татшӧм мога небӧгыс, кодӧс сійӧ дасьтылӧма Любовь Моторинакӧд да Жанна Сизевакӧд ӧтвыв, петавліс важӧнкодь нин, матӧ 20 во сайын, мича «Рӧмпӧштан» нимӧн. Сійӧ вӧлі жебджык сьӧвмӧса да ичӧтджык йӧрыша, а тайӧ небӧгыс абу сӧмын кызтанас тӧдчанаджык, сэтчӧ пыртӧма воддза серти кык пӧв унджык юрпас.
Коми сёрни шыяс да грамматика кузя гижӧдъяссӧ авторыс зумыда да эскӧдана подулалӧма коми газет-журналысь бӧрйӧм видлӧгъясӧн да нималана коми гижысьяслӧн висьт-кывбурысь пыртӧм юрвизьясӧн.
Йӧлгинь Цыпанов пуктӧ уна вын коми кывлысь терминологиясӧ сӧвмӧдӧмӧ. Лыддьысьысьлы сьӧлӧм вылас воана юргӧны сыӧн вӧзйӧм сёрнивизь (наклонение пыдди), эськӧа (сослагательнӧй, условнӧй пыдди), а сідзжӧ бишог (пӧжар пыдди). Найӧ тырвыйӧ стӧча восьтӧны кыв вежӧртаслысь пытшкӧслунсӧ.
Коми кыв йылысь сёрнитігӧн автор зільӧ тӧдмӧдны лыддьысьысьӧс комилы рӧдвуж кывъя войтыркӧд. Небӧгас пыртӧма «Вӧралыськӧд аддзысьӧм» висьт. Сэні висьтавсьӧ Важгортса челядь йылысь, кодъяс дыр кад письмӧасьӧны Удмурт Республикаысь Гондыргуртса (комиӧн кӧ, Ош сиктса) велӧдчысьяскӧд, кодъяс сэсся воӧны Коми муӧ, и челядь нуӧдӧны ылі муысь гӧсьтъясӧс войколӧн парма ёль дорӧ вуграсьны. Сэні аддзысьӧны вӧралыськӧд, коді тӧдмӧдӧ найӧс вӧр-валӧн гуся олӧмӧн.
Лыддьысьысьлысь пельсадьсӧ кыскӧ и сійӧ, мый Йӧлгинь Цыпановлы абу веськодь, коми кывлысь оланпассӧ кӧ дзугӧны, и та йылысь сійӧ век висьталӧ восьсӧн. Сідз, «Сёрнитыштам, ёртӧй!» небӧгын дивитӧ коми орфография кывкуд лӧсьӧдысьясӧс, кодъяс рочысь пырӧм кывъяссӧ сетӧмаӧсь абу коми ногӧн: праздник, бульдозер — празник, бульдозёр пыдди.
Йӧлгинь Цыпанов вӧзйӧ роч лыддьысьысьлы коми йӧзкостса дас квайт сьыланкыв, кӧні петкӧдчӧ матігӧгӧр вылӧ вужвойтырлӧн видзӧдласыс, вӧр-вакӧд сылӧн торйӧдны позьтӧм йитӧдыс. На лыдын «Козйӧ, козйӧ, мый сулалан?», «Шондібанӧй, олӧмӧй!», «Уна нывъяс чукӧртчисны», а сідзжӧ Нёбдінса Витторлӧн «Чужи-быдми сьӧд вӧр шӧрын», «Ӧтчыд овлӧ», Лебедевлӧн (Юсьлӧн) «Коми му кузя ме муна», «Мыйла нӧ, шондіӧй, вӧр сайӧ лэччӧмыд?», Чувьюрова Лидиялӧн «Пелысь», Чувьюров Василейлӧн «Вӧрын ветлӧ ош», Петыр Саньӧлӧн (Александра Мишариналӧн) «Август тӧлысь», Юшков Генагейлӧн «Маръямоль».
Сёрнитан небӧгсӧ автор озырмӧдӧма комиа-роча да роча-комиа кывкудъясӧн.
Тӧдӧмысь, тайӧ петасыс лоас пызанвывса лыддянторйӧн быдӧнлы, коді кӧсйӧ пыдісяньджык тӧдмасьны коми кывйӧн, коми йӧзлӧн нэмъяс чӧжӧн сӧвмӧм культураӧн да оласногӧн.
