КОМИ ЧЕЛЯДЬЛЫ — АНГЛИЯ МУЫСЬ

Шотландияса Дандэ карын таво петӧма «Алисакӧд Шемӧсмуын лоӧмторъяс» небӧг, кодӧс комиӧдӧмаӧсь Англия кывйысь Йӧлгинь Цыпанов да Алёна Ельцова.

Водзкывъяс висьтавсьӧ, мый англия кывйӧн гижысьыс Льюис Кэрролл овлӧма 1832–1898 воясӧ да челядьлы лыддьӧм вылӧ 1865 воӧ йӧзӧдлӧма «Алисалӧн Шемӧсмуын лоӧмторъяс» мойд.

Тайӧ небӧгсӧ регыдъя кадӧн вуджӧдӧмаӧсь мусяр пасьталаын 200 сайӧ кывйӧ. Йӧлгинь Цыпановӧдз да Алёна Ельцоваӧдз некод на эз тӧдмӧдлы коми челядьӧс Англия муысь бур сьӧлӧма Алиса нывкакӧд. Нимкодь, мый и комиӧн лои йӧзӧдӧма паськыда нималана небӧгсӧ. Йӧзкостса коми мойдъясысь сійӧ торъялӧ аслыссикас фантастикаӧн, вочасёрнияслы лӧсялан джӧмдӧдӧмъясӧн, тешкодьторъясӧн, пытшкӧсса иронияӧн.

Небӧгсӧ комиӧдысьяс ылі саридзсайса Англиялысь оласногсӧ серпасалӧм могысь вӧдитчӧны фунт, пенс, шиллинг сьӧм вежӧртаса кывъясӧн, королева, король, герцогань титул нимтан кывъясӧн. Сэк жӧ мойдсӧ авторъяс гижӧны сӧдз коми кывйӧн, рочысь пырӧм кывъяссӧ вежлалӧны ва комиӧн, шуам: баярныв «барышня», ёрд «суд», ёрдысь «судья», ӧксай «господин», ӧксань «госпожа», горткӧч «кролик», кый «змея», юмнянь «торт», савадоз «чернила доз», черигорт «аквариум», сераку «письмӧ»...

Авторъяс вӧдитчӧны тайӧ выль кывъяснас ыджыд лача кутӧмӧн, мый найӧ вочасӧн вужъясясны ӧнія коми сёрниӧ.

Йӧлгинь Цыпанов да Алёна Ельцова Англия кывъя мойд комиӧдӧмӧ сетӧмаӧсь ассьыныс сьӧлӧм бинысӧ. Та вӧсна небӧгыс лыддьыссьӧ кокниа, и коми челядьлы вежӧраныс зумыда пуксясны Алиса нывкалӧн виччысьтӧмторъясыс.

Англия кывйысь Льюис Кэрроллысь «Алисакӧд Шемӧсмуын лоӧмторъяссӧ» вуджӧдӧмыс зэв тӧдчана миян Коми мулӧн культуралы да, дерт жӧ, чужан кыв радейтысьяслы.