ИГӦ ВАСЬӦ ВОЛОДЬӦС НИМӦДНЫ
Неважӧн кувсис Владимир Тимин, кыдз асьсӧ шуліс: Игӧ Васьӧ Володь — нимйӧза гижысь, кодлӧн «Оз пӧ радейтны комияс сьывны», «Мича нывбаба верӧстӧг, быттьӧ потшӧстӧм йӧр» да мукӧд мыла кывбур йиджис миян вежӧрӧ.
Игӧ Васьӧ Володь эз сӧмын гижлы радейтчӧм йылысь. Сылӧн ыджыд йӧрыша гижӧдъясыс: «Эжва Перымса зонка», «Биармияса викинг» — висьталӧны коми войтырлӧн уна нэмсайса олӧм йылысь, сэні лои «восьтыштӧма пемыдыслысь ӧдзӧссӧ», кыдзи вӧлі шулывлӧ Илля Вась — ыджыд коми поэт.
Аслас романъясын Игӧ Васьӧ Володь шӧр геройяснас петкӧдлӧ томъясӧс, быдмысь войтырӧс.
И тайӧ зэв тӧдчана: нимйӧза коми гижысьлы эз вӧв веськодь, лоасны-ӧ водзӧ вылӧ комиӧн лыддьысьысь да гижысь войтырыс. Пасйӧм гижӧдъясас геройяслӧн олан визьныс лыддьысьысьӧс ышӧдана, томъяслысь пельсадьнысӧ кыскана. Авторыс чужтӧ велӧдчысьяслысь Айму дорӧ муслун.
Игӧ Васьӧ Володь эз сӧмын аслас творчествоӧн ышӧд коми ныв-зонмӧс гижны, а соссӧ пуджӧмӧн дасьтіс том гижысьясӧс, дас квайт во чӧж сійӧ веськӧдліс Гожся университетӧн, кытчӧ волывлісны республикаса да Коммуса школаясысь чужан кыв радейтысь велӧдчысьяс. Гожся университетыс поздысьліс Коми Республикаса искусствояс гимназияын, сэні дасьтісны художествоа гижӧд тэчысьясӧс да газетын удж вӧчысьясӧс.
Игӧ Васьӧ Володьлӧн веськӧдлӧм улын велӧдчысьяс быд во лэдзавлісны ассьыныс гижӧдъяснысӧ «Ловъя кыв» нима газетын да «Небыдик лов шы» нима альманахын.
Гожся университет помалысьясысь петісны кывбуралысьяс: Алёна Шомысова, Люба Ануфриева, Татьяна Шахова, Татьяна Кирпиченко, Алёна Старцева, Ольга Баженова. Журналистъясӧн зільӧны Инесса Пудкова (ӧні — Орёл), Алексей Корецкий, Надежда Трубачёва, Алёна Вахнина да мукӧд.
Игӧ Васьӧ Володьлы коми том гижысьясӧс быдтӧмысь бур паметьӧн эськӧ лоис пуктыны республикаса искусствояс гимназияӧ «Игӧ Васьӧ Володь — нимйӧза коми гижысьлы сиӧм класс» паса пӧв коми кыв да литература велӧдан класс ӧдзӧсӧ. Тані сійӧ зільліс коми ныв-зонлы чужан кыв мусмӧдан удж вылын.
Войвывса комияслӧн эм шусьӧг: кӧрлӧн кулӧм бӧрас кольӧ сюр, а мортлӧн — ним.
Игӧ Васьӧ Володь колис ассьыс бур нимсӧ миянлы ставнымлы, и мед гимназияса войтырлы сійӧ лоас вежаӧн.
