ИЧӦТ ЧУЖАНІНЛӦН ЫДЖЫД ОЛӦМ

«Пожня — большая жизнь малой Родины». Тадзи нимтӧма Валерий Хозяинов ассьыс выль небӧгсӧ, кодӧс лэдзӧма чужан грездыслы — Пожнялы — 200 во тыригкежлӧ.

В. И. Хозяинов дас во сайын гижлӧма нин вӧлі Пожнялы 190 во тырӧм йылысь казьтылӧмъяса небӧгтор, коді разалӧма ӧти здукӧн. Ӧд сэтӧн висьталӧма вӧлі сиктын олысьяс, налӧн бать-мам да пӧль-пӧч йылысь.

Валерий Хозяинов, кыдзи журналист, кутӧма нимавны район пасьтала. Водзмӧстчысь том морт заводитӧма юасьны орчча Уквавомын, Акимын, Пороскӧйын, Ӧдӧсдінын, Винлаын олысьяслысь, кыдзи сэтчӧ овмӧдчылӧмаӧсь, кытысьджык волӧмаӧсь сикт-грездныслы подув пуктысь важъя йӧзыс. Тадзи вочасӧн йӧзӧдӧма небӧгъяс Уквавом, Аким, Винла, Пороскӧй, Ӧдӧсдін, а сідзжӧ коми гижысь Митрук Як йылысь, кодлӧн чужаніныс — Уквавом. Дас вонас квайт небӧг!

Быд сикт йылысь гижигӧн В. И. Хозяинов йӧзӧдӧ сэтчӧс олысьяслысь казьтылӧмъяссӧ, важъя фотоснимокъяс. Тайӧ, дерт жӧ, содтӧ небӧг дінӧ лыддьысьысьлысь сьӧлӧм кыскӧмсӧ. Та вӧсна сикт-грезд йылысь небӧгъясыс лавка джаджйын оз куйлыны.

Пожня йылысь небӧгсӧ сиӧма сиктлӧн 200 вося юбилейлы. Та вӧсна сэтӧн тырмымӧн уна рӧма мича фотоснимокыс. Валерий Ивановичлӧн выль петасыс фотоальбом кодь, и быд гижӧдысь сэні ӧвтӧ кыпыдлунӧн.

Кӧть и небӧгас уна висьтавсьӧ гражданскӧй да Великӧй Отечественнӧй война вылын усьӧмаяс йылысь, авторыс эскӧдӧ лыддьысьысьӧс, мый эз весьшӧрӧ пуктыны юрнысӧ Пожняса айловъяс. Налӧн чужанінныс сӧвмӧ, налӧн пӧльӧн шуысьясныс пырӧдчӧны паськыд мирас и оз вунӧдны 200 во сайын вужйӧдлӧм чужан грезднысӧ, лэптӧны выль керкаяс, кыпӧдӧны видз-му овмӧснысӧ.

Валерий Хозяиновлӧн мудз тӧдтӧм уджыс зэв тӧдчана да колана! Сійӧ ышӧдӧ том войтырӧс сьӧлӧмсянь радейтны ассьыныс ичӧт чужаніннысӧ, водзӧ туявны сылысь озыр нэмсӧ.