СІЙӦ МЕНАМ ВУНАС СӦМЫН ДЗЕБАНІНЫН...
Ситкарев Геннадий Егорович.
Чужлӧма Комиын, Сыктыв районса Куниб сиктын.
Война вылӧ мунӧма 1941 воӧ. Велӧдчӧма Ленинградса военнӧй училищеын. Гӧтырыс вӧлӧма военврач, Ташкентысь. Кык во сайын кувсьӧма. Быдтӧмаӧсь кык пиӧс.
Тадзи висьталіс Сыктывкарын олысь воча чойыс Валентина Гаврииловна Козлова да сетіс вокыслысь письмӧ. Сэтысь кылӧ чужан мусьыс гаж бырӧмыс, сійӧс быд лун казьтылӧмыс.
Геннадий Егорович нэмсӧ вӧлӧма военнӧйӧн. Ӧні пенсия вылын. Со мый сійӧ гижӧ «Коми му» газетӧ:
«Менсьым гижӧдъясӧс ті йӧзӧдлінныд. Меным таысь зэв нимкодь, ме таысь шуда.
Олан туйӧй нуӧдіс менӧ чужан муысь ылӧ. Но ме некор эг вунӧдлы чужанінӧс, мам кывйӧс. Ичӧтсянь менам юрын бергалӧны Иван Куратовлӧн чуймӧдана юрвизьяс:
Коми кыв, ме тӧда,
Ыджыдтор оз шу на.
Тӧда ме и сійӧ —
Оз и сӧр на уна...
Тайӧ кыв ме кывлі
Аслам люлю дінын.
Сійӧ менам вунас
Сӧмын дзебанінын.
Тайӧ кывъяссӧ видзӧ менам вежӧр, менам юр садьӧй. Ме коми, радейта ассьым кыв, чужан муӧс, кӧть и ола сысянь ылын-ылын.
Менам син водзын педучилище, кӧні мойвиис велӧдчыны 1938–1941 воясӧ. Син водзӧ сувтӧ и кад, кор сетісны погонъяс.
Ме водзын пыр ас мулӧн, ас карлӧн серпасыс, ас кыв, кодӧс некор дзик ог вунӧд. Ме водзын ёртъясӧй, кодъяс усисны косьын — и эз этшаӧн.
Веськавланныд кӧ миян карӧ, кӧні ме ола ӧні, пыралӧй ме дінӧ. Менам ас олӧм йылысь эм уна гижӧд комиӧн. Комиӧн жӧ ме гижи луннебӧг, кор велӧдчи карын, кор вӧлі фронт вылын, кор служиті война бӧрын.
Меным 89 арӧс нин. Менам, 1 группаа инвалидлӧн, эм сьӧлӧм пыдзыртана висьтасьӧм. Ме зэв ёна пыдди пукта сійӧс, кӧть ог дзоньнас сы дор сувт. Тайӧс колӧ тӧдны томъяслы, кодъяслы овны водзӧ.
Эн дивитӧй, омӧля нин синмӧй аддзӧ да киӧй лёка кутӧ гижанбордсӧ».
Чужан му дорйысь — чужан кыв радейтысь!
Морт, коді дорйис Аймунымӧс Ыджыд войнаын, быдӧнлы донасьыс-дона. Но торйӧн нин дона сійӧ, коді чужан му дорйигас веськаліс гортсяньыс ылӧ да нэм чӧжыс олӧ мукӧд кывъя войтыр пӧвстын, а чужан кывсӧ видзӧ сӧстӧма, гижӧ сійӧн луннебӧгсӧ, казьтылӧмъяссӧ, шыӧдчылӧ коми газетӧ. Татшӧм войтыр лыдысь колӧ тӧдчӧдны Сыктыв районса Куниб сиктысь, Пустӧш грездысь петлӧм Ситкарев Геннадий Егоровичӧс, коді 18 арӧса зонмӧн война заводитчан воӧ Сыктывкарса педучилищеысь мунӧма Ленинградса военнӧй училищеӧ, медым сэсся дорйыны чужан мунымӧс.
Айму вӧсна тышкасьӧмыс сылӧн абу помасьӧма 1945 воын. Белоруссияса Гомель карын офицералӧма и ӧні олӧ сэні, кӧні нэмсӧ уджаліс. Война кадӧ военврач Татьянакӧд ӧтувтчӧма. Налӧн чужӧма кык пи. Ыджыдджыкыс — Валерий — воӧдчӧма Гомель карса заводӧн веськӧдлысьӧдз, но кольӧм нэмся 90-ӧд воясся гудыр кадӧ кувсьӧма. Мӧд пиныс — Ӧльӧксан — ӧні семьяыскӧд олӧ Мӧскуаын.
Муӧдз копыр окота шуны Геннадий Егоровичлы чужан мунымӧс дорйӧмысь, чужан кывнымӧс пыдди пуктӧмысь.
Тіян олӧмныд, дона Геннадий Егорович, ышӧдӧ миянӧс, томджыкъясӧс и быдмысь войтырсӧ, сӧстӧма видзны пӧль-пӧчьяслысь кывсӧ да сьӧлӧмсянь радейтны ас мунымӧс.
