КЫЙСЬЫСЬЯСЛӦН СЬЫЛАНКЫВ

Югыд яг, кӧн быдмӧ пожӧм,
Тшӧкыд козъя пемыд сёрд
Тулыс, ар и тӧв, и гожӧм
Оз мудз гежмавны том морт.

Парма вӧрын кыпыд ловлы.
Вӧрлӧн абу пом ни дор.
Юргы, йӧла, юргы, новлы
Кыйсьысь мортлысь сьылан гор.

Кыйсьысь вӧрын — кыдзи гортын,
Сылы абу тӧдтӧмин.
Став туйвизь и посни ордым
Аддзӧ кыйсьысьлӧн ёсь син.

Парма вӧрын кокни ловлы.
Вӧрлӧн абу пом ни дор.
Юргы, йӧла, юргы, новлы
Кыйсьысь мортлысь сьылан гор.

Кужам лыйны урлы синмӧ.
Вермам пуртӧн кыйны ош.
Лэбысь пӧткаыслы инмӧ
Лыйӧм, некор весь оз вош.

Парма вӧрын долыд ловлы.
Вӧрлӧн абу пом ни дор.
Юргы, йӧла, юргы, новлы
Майбыр мортлысь сьылан гор.