ЮГДӦ ТЭ ВЕСЬТЫН, КУБА

Югдӧ.
Лым сэтшӧм надзӧник усьӧ,
Быттьӧ яндысьӧ Войвывса мусьыс.
Ывла ыркыдлун сьӧлӧмлы любӧ.
Бара тэ йылысь думъясӧй, Куба.
Куба, донаӧй, мыйла нӧ сідзсӧ? —
Эг на аддзыв пӧсь муыдлысь мичсӧ,
Эг на топӧдлы Кастролысь кисӧ,
Партизанкӧд эг пестывлы би сэн.
Уна вир йиджліс морӧсад, Куба.
Сола синваыс шогтӧ эз дубӧд.
Весиг сакарыд курыд сэк лоліс,
Мудзӧм пиыд кор чай юис, поліг.
...Лым тан гӧрдӧдӧ, сӧмын оз вирла:
Кыа козьналӧ зарнисӧ мирлы.
Мед жӧ гӧрдӧдас лым — кыа биысь,
Сакар гӧрдӧдас сӧмын чай пиын.
Кыа рӧма дзик знамяным миян,
Сідзкӧ, югыдлань чуксалӧ сійӧ.
Мунӧ олӧмыс водзӧ, оз дугды.
Югдӧ тэ весьтын, Куба.
Пыр югдӧ!